उच्च लयमा रहेको अस्ट्रियाको नजर क्वार्टरफाइनलमा, रोक्ने दाउमा टर्किए

जर्मनीमा जारी युरोकप फूटबल प्रतियोगिताको प्रिक्वार्टरफाइनलअन्तर्गत मंगलवार मध्यराति अस्ट्रिया र टर्किए भिड्दैछन् ।

यो खेल नेपाली समयअनुसार मध्यराति १२ः४५ बजे लाइपजिगमा शुरू हुनेछ ।

अस्ट्रिया सरप्राइज नतिजा निकाल्दै समूह ‘डी’को विजेताको रुपमा अन्तिम १६ मा पुगेको हो । उच्च लयमा रहेको उसले फ्रान्स र नेदरल्यान्ड्सजस्ता टोलीलाई पछि पारेको छ । 

अर्कोतिर टर्किए समूह ‘एफ’को उपविजेताको रुपमा नकआउट चरणमा पुगेको हाे । 

समूह विजेता बनेकाले अस्ट्रियाको मनोबल उच्च छ । टर्किएलाई हराउँदै उ क्वार्टरफाइनलमा पुग्ने अधिकांश फूटबल पण्डितको अनुमान छ । छिमेकी देशमा भएको प्रतियोगिताकाे फाइदा लिने दाउमा अस्ट्रिया देखिन्छ । अस्ट्रियाका अधिकांश खेलाडी जर्मन लिगमा खेल्छन् । यसर्थ उनीहरू त्यहाँको मैदानप्रति परिचित छन् । 

यद्यपि, विगतमा भने टर्किए थोरै अगाडि देखिएको छ । यी दुईबीच ६ पटक भेट हुँदा टर्किएले ३ पटक जीत हात पारेको छ । अस्ट्रियाको नाममा भने २ जीत दर्ता भएका छन् । एक खेल भने बराबरीमा सकिएको छ । यसर्थ, टर्किए विगतको इतिहास दोहोर्याउँदै आज राति अस्ट्रियामाथि जीत निकाल्न चाहन्छ ।    

यसअघि हुने खेलमा रोमानिया र नेदरल्यान्ड्सबीच भिड्दैछन् ।

यो खेल नेपाली समयअनुसार राति ९ः४५ बजे म्युनिखस्थित एलिनाज एरिनामा हुनेछ ।

समूहमा तेस्रो हुँदै अन्तिम १६ मा पुगेको भएपनि नेदरल्यान्ड्स फिफा वरीयतामा रोमानियाभन्दा ४० स्थान माथि छ । 

विगतमा पनि नेदरल्यान्ड्स रोमानियामाथि हाबी हुँदै आएको छ । यसअघि भएका १४ वटा भेटमा रोमानियाले एउटा मात्र जीत निकालेको छ । १० खेलमा पराजित हुँदा ३ खेल भने बराबरीमा सकिएका छन् । 

अन्तिमपटक २०१७ मा मैत्रीपूर्ण खेलमा भेट हुँदा नेदरल्यान्ड्सले रोमानियालाई ३–० गोल अन्तरले पराजित गरेको थियो ।  

यसर्थ आज राति पनि रोमानियामाथि नेदरल्यान्ड्स हाबी हुने फूटबल पण्डितहरूको विश्लेषण छ । नेदरल्यान्ड्स सोही योजनासहित मैदानमा उत्रने छ ।

यद्यपि, बेल्जियमजस्तो टोली रहेको समूहमा विजेता बन्दै अन्तिम १६ मा पुगेकाले रोमानियाको मनोबल उच्च छ । उ आज राति अर्को ‘सरप्राइज’ नतिजा निकाल्ने ध्याउन्नमा हुनेछ ।