यसरी बनाउनुस् स्वादिलो पनीर मम

काठमाडौं, १६ कात्तिक — जाडोमा तात्तातो मम खानुको मज्जा बेग्लै छ । तात्तातो पनीर ममको सूप बनाएर खानुस् न त यसपाली । विधि सिकाउनलाई हामी छँदैछौं ।

सामग्री

ममका लागि
मैदा दुई कप
नून आधी चम्चा
जैतूनको तेल दुई चम्चा
पानी आधी कप

ममभित्रको किमाका लागि
जैतूनको तेल दुई चम्चा
प्याज एउटा काटेको
अदुवा र लसुनको पेस्ट एक चम्चा
बन्दाकोभी दुई कप
गाजर एक टुक्रा पारेको
पनीर एक कप
नून एक चौथाइ चम्चा
चूक अमिलो एक चम्चा
सोया सस एक चम्चा
चिल्ली सस आधी चम्चा

सूपका लागि
तिल एक चौथाइ कप
जीरा एक चम्चा
तेल दुई चम्चा
रातो खुर्सानी दुईवटा
लसुन एक पोटी
टमाटर एक कप
हरियो धनियाँ
अदुवा एक इन्च
बेसार आधी चम्चा
नून आधी चम्चा
पानी दुई कप
कागतीको रस दुई चम्चा

विधि
सबभन्दा पहिले एउटा भाँडोमा मैदा, नून, जैतूनको तेल र पानी हालेर मज्जाले मुछ्नुस् ।

अब एउटा प्यानमा तेल तताएर त्यसमा प्याजलाई हल्का खैरो हुनेगरी फ्राई गरेर अदुवा, लसुनको पेस्ट, बन्दागोभी र गाजर हालेर हल्का फ्राई गर्नुस् ।

त्यसमा पनीर, नून, चूक अमिलो, सोया सस र चिल्ली सस हालेर पकाउनुस् । अब पीठोका डल्लामा किमा हालेर १० मिनेटसम्म स्टीम गर्नुस् ।

एउटा प्यानमा तिल र जीरा हालेर हल्का खैरो हुन्जेल भुट्नुस् । त्यसमा तेल, सुकेको रातो खुर्सानी र लसुन हालेर मज्जाले भुट्नुस् ।

अब त्यसलाई मिक्सीमा हालेर टमाटर, हरियो धनियाँ, अदुवा, बेसार, नून र पानी हालेर पाँच मिनेटसम्म ब्लेन्ड गर्नुस् ।

एउटा प्यानमा अघि ब्लेन्ड गरेको कुरालाई कागतीको रस र चिनी हालेर पाँच मिनेट पकाउनुस् ।

अब एउटा प्लेटमा मम र सूप हालेर त्यसमा हरियो धनियाँको गार्निश गर्नुस् ।

पनीर मम सूप तयार भयो । तात्तातो पस्केर खानुस् ।

एजेन्सी