काठमाडौंँ, १९ कात्तिक - केन्द्रको राजनीतिमा रहेका धेरै नेताहरू आसन्न निर्वाचनमा प्रदेशसभाको उम्मेदवार बनेका छन् । यसरी केन्द्रबाट प्रदेशमा जानेमा एमालेबाट धेरै जना नेता छन् ।
एमालेबाट उपाध्यक्ष अष्टलक्ष्मी शाक्य, सचिवद्वय शङ्कर पोखरेल र पृथ्वीसुब्बा गुरुङसहितका नेता प्रदेशसभाका लागि उम्मेदवार छन् । शाक्य प्रदेश ३ अन्तर्गत काठमाडौंँ – ८ को ‘ख’ बाट, पोखरेल प्रदेश ५ अन्तर्गत दाङको क्षेत्र नं. २ ‘क’ बाट र गुरुङ प्रदेश ४ लम्जुङ ‘ख’ बाट उम्मेदवार बनेकी छन् ।
एमालेबाट पोलिटब्युरो सदस्य एवम् पूर्व सञ्चार मन्त्री शेरधन राई, भीम आचार्य, राजेन्द्रप्रसाद पाण्डे, किरण गुरुङ र विद्यार्थी नेता राजेन्द्र राई पनि प्रदेशसभाको उम्मेदवार छन् । शेरधन र राजेन्द्र प्रदेश १ भोजपुरको क्रमश ‘ख’ र ‘क’ बाट उम्मेदवार छन् । आचार्य प्रदेश १ सुनसरीको १ ‘क’ बाट उम्मेदवार छन् ।
एमालेबाट प्रदेशसभामा उम्मेदवार बनेका कतिपय शीर्ष नेताहरूलाई प्रदेशको मुख्यमन्त्रीको दाबेदारको रूपमा हेरिएको छ । कतिपय नेताले आफू मुख्यमन्त्री बन्ने घोषणा नै गरे पनि एमालेले त्यसबारे कुनै निर्णय भने गरेको छैन ।

पहिलो पटक हुन लागेको प्रदेशसभाको चुनावमा नेपाली काँग्रेसबाट निकै कम मात्र ठूला नेता प्रदेशसभामा छन् । प्रदेशसभामा उम्मेदवारी दिने काँग्रेसको माथिल्लो तहको नेता जीवनबहादुर शाही छन् । उनले प्रदेश ६ अन्तर्गत हुम्लाको ‘ख’ बाट उम्मेदवारी दिएका छन् । पूर्व मन्त्रीसमेत रहेका शाहीलाई काँंग्रेसले प्रदेशको मुख्यमन्त्रीको रूपमा अगाडि सारेको ठानिए पनि कुनै औपचारिक निर्णय भने भएको छैन ।
कांग्रेसबाट प्रदेशसभामा सदस्य हुने अन्य राष्ट्रिय राजनीतिमा स्थापित नेताहरूमध्ये प्रदेश ३ मा जगदीश नरसिंह केसी नुवाकोट २ को ‘क’, काठमाडौं २ ‘क’ मा लोकेश ढकाल पनि छन् । त्यस्तै प्रदेश १ अन्तर्गत सोलुखुम्बुको ‘ख’ बाट आङ्गेलु शेर्पा र प्रदेश ४ अन्तर्गत तनहुँको १ ‘क’ मा विद्यार्थी आन्दोलनबाट आएका नेता प्रदीप पौडेल पनि छन् ।
नेकपा माओवादी केन्द्रबाट सचिवालय सदस्य कुलप्रसाद केसी, महेन्द्रबहादुर शाही, शालिग्राम जम्मकट्टेल, कृष्णध्वज खड्का, राधिका तामाङसहितका नेताहरू प्रदेशसभाको उम्मेदवार बनेका छन् । केसी र खड्का प्रदेश ५ रोल्पाको क्षेत्र १ ‘क’ र प्युठानको क्षेत्र १ ‘ख’ बाट उम्मेदवार छन् । शाही प्रदेश ६ अन्तर्गत कालिकोटको ‘ख’ बाट उम्मेदवार छन् । स्थानीय तहको निर्वाचन परिणामअनुसार माओवादी केन्द्रले प्रदेश मुख्यमन्त्री दाबी गर्ने बलियो सम्भावना देखिएको यो एक मात्र प्रदेश हो जहाँ शाहीलाई मुख्यमन्त्रीको दाबेदारको रूपमा हेरिए पनि कुनै निर्णय भने गरिएको छैन ।
जम्मकट्टेल प्रदेश ३ अन्तर्गत धादिङको १ ख मा उम्मेदवार बनेका छन् । तामाङ महिलामध्ये पहिलो राज्य मन्त्रीसमेत बनेकी राधिका तामाङ नुवाकोटको १ ‘क’ बाट प्रदेशसभाको उम्मेदवार छिन्, गोरखापत्रमा खबर छ ।

---

---