विषादी प्रयोगमा कमी आएन, प्रयोग मुक्त सप्ताह मनाउँदै मन्त्रालय

काठमाडौं, १६ पुस– घातक विषादी मुक्त संसार, स्वास्थ जीवन र पर्यावरणको आधार भन्ने नाराका साथ सोमबारबाट  विषादी प्रयोग मुक्त सप्ताह हुने भएको छ । कृषि मन्त्रालय अन्तरगत वाली संरक्षण निर्देशनालयले विभिन्न कार्यक्रमको आयोजना गरी साताव्यापी विषादी मुक्त सप्ताह मनाउन लागेको हो । 

नेपालमा बढ्दै गएको विषादीको प्रयोगलाई नियन्त्रण गर्न नेपालले सन् २०१३ देखि विषादी मुक्त सप्ताह मनाउँदै आएको निर्देशनालयका कार्यक्रम निर्देशक अच्युतप्रसाद ढकालले बताए । निर्देशनालयले कृषि विभागबाट जावलाखेलसम्म प्रभातफेरी, विभिन्न सञ्चार माध्यममा विषादीसँग सम्बन्धित कार्यक्रम प्रसारण, काठमाडौं उपत्यकाका नाका तथा बजारहरुमा तरकारीको नमुना लिई परिक्षणको कार्यक्रम गर्ने जनाएको छ ।

त्यस्तै निर्देशनालयले केन्द्र तथा जिल्लाहरुमा सडक नाटक प्रदर्शन, अन्तरक्रिया, काठमाडौं उपत्यका लगायत विभिन्न जिल्लाहरुमा सार्वजनिक स्थलमा पर्चा तथा पोष्टर वितरणदेखि नेपाल टेलिकमबाट एसएमएस प्रसारण गर्ने जनाएको छ । 

सन् १९५२ मा मलेरिया रोग नियन्त्रणको लागि भित्र्याइएको विषादी हाल कृषि उत्पादनको क्षेत्रमा व्यापक प्रयोग हुदै आएको छ ।  कृषि विकास मन्त्रालयको तत्थ्याङ्क अनुसार गत वर्ष नेपालमा विदेशबाट ५ सय ७४ टन विषादी आयत भएको छ ।

विदेशी मुलुकबाट गत वर्ष कीटनासक १ सय ८१ टन रोगनाशक २ सय ४७ टन, झारनाशक १ सय ३४ टन र अन्य ११ टन विषादी नेपाल भित्रिएको छ । नेपालले गत वर्ष मात्रै ६९ करोड रुपैयाँको विषादी विदेशी मुलकबाट खरिद गरेको छ  । नेपालमा आयत हुने ८५ प्रतिशत विषादी तरकारी वालीमा प्रयोग हुने गरेको सरकारी तत्थ्याङ्क छ । 

विषादीको प्रयोगले मानव शरीरमा प्रत्यक्ष र अप्रत्क्ष रुपमा असर पारीरहेको कृषि विज्ञहरु बताउँछन् ।  संसारमा हरेक वर्ष ४ करोड मानिसलाई विषादीले असर गर्ने गरेको र करिव ३ लाख ५५ हजार मानिसको मृत्यु हुने गरेको तत्थ्याङ्कहरु सार्वजनिक भएको छ । 

सरकारले साताहाव्यापी कार्यक्रम सञ्चालन गर्ने वाहेक अन्य समयमा विषादी प्रयोगलाई रोक्ने अभियान नचलाउँदा विषादी प्रयोग र आयातका कुनै कमी नआएको सरोकारवालाहरुको आरोप छ ।