काठमाडौं – बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) सम्मेलनमा कनेक्टिभिटीको एजेण्डामा सहमति गर्ने तयारी गरिएको छ । लामो समयदेखि तयारी अवस्थामा रहेको यातायात तथा पारवहन सम्झौताको तयारीलाई अन्तिम रूप दिने गरी तयारी भइरहेको परराष्ट्र मन्त्रालय स्रोतले जनाएको छ । 

सम्मेलनमा ऊर्जा व्यापार, बौद्ध सर्किट, पर्यटन प्रवद्र्धन र जलवायु परिवर्तनको प्रभाव घटाउने लगायतका १६ बुँदे एजेन्डा प्रस्तुत गर्ने तयारी भएको छ । १६ बुँदालाई समायोजन गर्दै कम बुँदामा समेटेर आज अन्तिम रूप दिने तयारी छ । बिमस्टेकका सबै सदस्य राष्ट्रलाई सतह, जल र हवाइ मार्गबाट जोड्ने मात्र नभई विद्युत् प्रसारण ग्रीड तथा अप्टिकल फाइबरबाट जोड्ने विषयलाई नेपालले उच्च महत्त्व दिएको छ ।

सम्मेलनमा सदस्य राष्ट्रको चौतर्फी विकासमा सघाउन बिमस्टेक विकास कोष स्थापना, दुई दशक पार गरेको संगठनको बडापत्र निर्माण, समग्र बिमस्टेक क्षेत्रलाई शान्ति, समृिद्ध र दिगोपनातर्फ उन्मुख गराउने तथा गरीबी हटाउने विषय सम्मेलनका प्रमुख कार्यसूची हुनेछन् ।

यही भदौ १४ र १५ मा शान्त, समृद्ध र दीगोपनाका लागि बंगालको खाडीतर्फ भन्ने मूल नाराका साथ काठमाडौंमा हुन लागेको हो । सम्मेलनमा बिमस्टेक क्षेत्रका ७ वटै देशका राष्ट्र प्रमुख तथा कार्यकारी प्रमुखको उपस्थिति रहनेछ ।
सम्मेलनमा भाग लिन म्यानमारका राष्ट्रपति युमिन मिच मंगलबार १२ गते साँझ काठमाडौं आइपुग्ने कार्यक्रम छ । १३ गते नेपालमा दुईपक्षीय भेटघाट गर्ने कार्यक्रम रहेको जनाइएको छ ।

यसैगरी १३ गते बुधबार श्रीलङ्कन राष्ट्रपति मेट्रिपाला शिरिसेना र भुटानका प्रधानन्याशीश योङ ओ छिरिङ वाङ्चो नेपाल आइपुग्ने कार्यक्रम छ ।  सम्मेलन उदघाटनका दिन १४ गते बिहान भारतीय प्रधानमन्त्री मोदी, बंंगलादेशका प्रधानमन्त्री शेख हसिना र थाइल्यान्डका प्रधानमन्त्री आइपुग्ने कार्यक्रम छ । १४ गते दिउँसो राष्ट्रपति भवन शितलनिवासमा भेटघाट तथा दिवाभोज कार्यक्रपश्चात् होटल सोल्टीमा सम्मेलनको उद्घाटन हुनेछ । साँझ हायात होटलमा रात्रिभोजको कार्यक्रम छ ।

१५ गते केही महत्त्वपूर्ण दस्ताबेजहरूमा हस्ताक्षर हुनेछ । सम्मेलनपछि १६ गते श्रीलंकका र म्यानमारका राष्ट्रपतिले लुम्बिनीको भ्रमण समेत गर्ने कार्यक्रम छ ।  बिमस्टेक सम्मेलनपछि भारतीय प्रधानमन्त्री नरेन्द्र मोदीले पशुपति क्षेत्रमा भारतीय लगानीमा बनेको धर्मशालाको उद्घाटन गरी नेपाललाई हस्तान्तरण गर्ने कार्यक्रम रहेको छ ।  

समानता र सहकार्यको मर्मलाई आत्मसात् गर्दै सदस्य मुलुकको आर्थिक वृद्धि र सामाजिक समृद्धि संयुक्तरूपमा हासिल गर्ने उद्देश्यले २२ वर्षअघि बिमस्टेक स्थापना भएको हो । दक्षिण तथा दक्षिणपूर्वी एशियाली मुलुकको यस उपक्षेत्रीय संगठनमा नेपालसहित भारत, बंगलादेश, भुटान, म्यानमार, श्रीलंका र थाइल्याण्ड सदस्य छन् ।

सन् १९९७ मा स्थापना भएको यो संगठनको पहिलो सम्मेलन थाइल्याण्डमा सन् २००४ मा भएको थियो । दोस्रो सम्मेलन सन् २००८ मा भारतमा तथा तेस्रो सम्मेलन सन् २०१४ मा म्यानमारमा भएको थियो । त्यसपछिको अध्यक्ष राष्ट्र नेपाल हो । कार्यतालिका अनुसार नेपालमा चौथो सम्मेलन हुन लागेको हो ।