सुर्खेत- २०७१ सालमा सुर्खेतमा आएको बाढीले विस्थापित भएका पीडितहरु वर्षा आउन लागिसक्दा पनि पालमै बस्न बाध्य भएका छन् ।

प्रदेश सरकारले ५ सय १४ घर परिवारको पुनःस्थापनाका लागि विभिन्न स्थानीय तहलाई सात करोड ७१ लाख बजेटको अख्तियारी दिँदा पनि स्थानीय तह बेखबर बनेको बाढी पीडितहरुको गुनासो छ ।

ती सबै घरधुरीले पहिलो किस्तावापत प्रतिपरिवार १ लाख ५० हजार पाउनेछन् ।

आन्तरिक मामिला तथा कानून मन्त्रालयले वीरेन्द्रनगर नगरपालिकाका २ सय ३ परिवारका लागि ३ करोड ४ लाख ५० हजार, पञ्चपुरी नगरपालिकाका १६ घरधुरीका लागि पहिलो किस्तावापतको २४ लाख, बराहतालका ९१ घरधुरीका लागि एक करोड ३६ लाख ५० हजार प्रतिपरिवार एक लाख ५० हजारका दरले वितरण गर्ने गरी मन्त्रालयले अख्तियारी दिइसकेको छ ।

भेरी गंगा नगरपालिकाका १ सय ६० घरका लागि २ करोड ४० लाख, गूर्भाकोट नगरपालिकाका ३२ घरका लागि ४८ लाख र लेकबेसी नगरपालिकाका १२ घर धुरीका लागि १८ लाख बजेट खर्च गर्ने अख्तियारी दिइसकेको आन्तरिक मामिला तथा कानून मन्त्री नरेश भण्डारीले बताए ।

वीरेन्द्रनगर नगरपकालिकाले भने एकदुई दिनमै रकम वितरण गर्ने जानकारी दिएको छ। ‘हामीले सबै प्रक्रिया पुरा गरिसकेका छौं । सबै तथ्यांक पनि संकलन भइसकेको छ,' नगर उपप्रमुख मोहनमाया ढकालले भनिन, ‘कोष तथा लेखा नियन्त्रण कार्यालयबाट रकम नगरमा आउनेबित्तिकै हामी जनतालाई रकम प्रदान गर्नेछौं ।’

बराहताल गाउँपालिकाका अध्यक्ष तेजबहादुर बस्नेतले बढीमा पाँच दिन भित्र पीडितको खातामा रकम जम्मा गरिसकिने बताए । ‘हामीले सबैलाई बैंक खाता खोल्न बनेका छौं । विभिन्न समितिहरु सक्रिय छन् । उहाँहरुलाई छानोमुनि ल्याउन हामी प्रतिबद्ध छौं,' उनले भने, ‘विविध कारणवश प्रमुख प्रशासकीय अधिकृत काठमाडौं जानु भएको छ । उहाँ भोलि आउनुहुन्छ र हामी पैसा पीडितको खातामा जम्मा गरिदिन्छौं ।’