जापानमा राजा नारुहितोले गरे गद्दी आरोहण

काठमाडौं – जापानका राजा नारुहितोले मंगलवार लगभग दुई हजार स्वदेशी तथा विदेशी पाहुनाको उपस्थितिमा गद्दी आरोहण गरेका छन् । टोक्योस्थित राजदरबारमा प्राचीन किसिमको समारोहमा उनले गद्दी आरोहण गरेका हुन् । 

५९ वर्षीय राजाले विशेष अवसरमा मात्र लगाइने गाढा सुन्तला रंगको वस्त्र लगाएका थिए । उनले ६.५ मिटर अग्लो ताकामिकुरा गद्दीमा चढेर गद्दी आरोहणको घोषणा गरेका हुन् । समारोहमा पत्नी मासाकोलाई सँगैको मिचोदाइ गद्दीमा राखिएको थियो । 


Advertisement

‘जापानको संविधानबमोजिम तथा राजदरबारको कानूनमा रहेको विशेष कानूनबमोजिम गद्दीको उत्तराधिकार प्राप्त गरेको म अहिले स्वदेशी तथा विदेशी पाहुनाका अगाडि गद्दी आरोहण गरेको घोषणा गर्छु,’ उनले ताकामिकुरामा घोषणा गरे । 

आफूले संविधानबमोजिम काम गर्ने र राज्य तथा जापानी जनताको एकताको प्रतीकका रूपमा जिम्मेवारी निर्वाह गर्ने उनले बताए । 

पानी परिरहेको भए पनि सानो समूहमा मानिसहरू राजदरबारको ढोकामा जापानी झण्डा हल्लाउँदै नारुहितोलाई उत्साहित बनाइरहेका थिए । नारुहितोले कारको खुला झ्यालबाट जनतातर्फ फर्केर हात हल्लाउँदै मुस्काएका थिए । 

नारुहितोको गद्दी आरोहण समारोहमा शाही परिवारका सदस्य तथा शीर्ष नेताहरू उपस्थित थिए । नेपालकी राष्ट्रपति विद्यादेवी भण्डारी सहित अन्य देशका राष्ट्रप्रमुखहरू पनि समारोहमा उपस्थित थिए । 

यसै वर्षको मे महिनामा ८५ वर्षीय पिता सम्राट अकिहितोका उत्तराधिकारीका रूपमा नारुहितोले गद्दी प्राप्त गरेका थिए । जिउँदै छँदा गद्दी त्याग्ने अकिहितो विगत २०० वर्षमा पहिलो जापानी सम्राट हुन् । 

आजको समारोह चाहिँ नयाँ सम्राटको गद्दी आरोहणको औपचारिक घोषणा गर्नका लागि आयोजना गरिएको हो ।

जापान टाइम्सबाट

कमेन्ट गर्नुहोस्