इलाम–२ उपचुनावअन्तर्गत नेपाली कांग्रेसले उम्मेदवार बनाएका डम्बर खड्का निर्माण व्यवसायी हुन् । आफ्नो क्षेत्रमा उनले ठेक्का पाएका कतिपय योजनाहरू अहिले पनि अलपत्र छन् । भन्ज्याङ–बेलासे सडक अलपत्र बनाएको आरोप उनीमाथि छ । वसन्त नेम्वाङ भौतिक पूर्वाधार विकास मन्त्री भएको बेला भन्ज्याङ–बेलासे सडकको ठेक्का लागेको थियो । इलाम बजारबाट बिर्तामोड जाने ‘फास्ट ट्र्याक’का रूपमा समेत बाटोलाई लिने गरिएको छ । यो सडकको म्याद थपसमेत भएको छैन । खड्काले म्याद थपका लागि निवेदन भने दिएका छन् । डम्बरले योजनामा काम गर्ने मजदुरलाई समेत पारिश्रमिक नदिएको आरोप छ । यिनै नाराहरूलाई विपक्षीहरूले भित्रभित्रै मुद्दा बनाइरहेका छन् । 

उनी पार्टीभित्र संस्थापन पक्षका मान्छिन् । उनलाई गुट मिलाउन पनि हैरान परेको कांग्रेसकै नेताहरू बताउँछन् । डम्बरको विपक्षमा ५ वटा गुट रहेको कांग्रेस नेताहरूको भनाइ छ । स्थापन इतरका भेषराज आचार्यलगायत नेताहरू समेत वैशाख ४ गतेसम्म चुनावी अभियानमा सक्रिय थिएनन् । तर, कांग्रेस नेता डा. शेखर कोइरालाको निर्देशनपछि आचार्य फिल्डमा हिँड्न थालेका छन् । चुनावी अभियानमा खटे पनि उनी निराश रहेको उनको सम्बोधनले देखाउँछ । उनले सम्बोधनका क्रममा आफूले ३९ वर्षसम्म पार्टीमा काम गरेको तर, अवसर नपाएको गुनासो गर्ने गरेका छन् । आचार्यलाई स्वच्छ छवि भएको नेता भनेर चिन्ने गरिएको छ । स्थानीय कमिटी, क्षेत्रीय तथा जिल्ला कमिटीले समेत पहिलो नम्बरमा आचार्यको नाम सिफारिस गरेको थियो । 

इलाम बहुमुखी क्याम्पसका सहप्राध्यापक दीपेन्द्र दुलालले पनि कांग्रेसमा गुट र उपगुट रहेको बताए । बहुमत वडा सभापतिदेखि स्थानीय तहका जनप्रतिनिधिसमेत खुलेर नहिँडेको उनले बताए । 

इलामका ४२ वटा वडा यस क्षेत्रमा पर्छन् । त्यसमध्ये ३७ जना वडा सभापतिहरूले आचार्यको नाम सिफारिस गरेको उनी निकटका नेताहरू बताउँछन् । डम्बरको नाम तेस्रो नम्बरमा सिफारिस भएको थियो । ‘भेषराज दाइको नाम स्थानीय, क्षेत्रीय, जिल्ला कमिटी हुँदै प्रदेश कमिटीले पनि पहिलो नम्बरमा सिफारिस गरेको थियो,’ कांग्रेसका जिल्ला स्तरका एक नेताले भने, ‘केन्द्रमा पहुँचका भरमा खड्काले टिकट ल्याउनुभयो । त्यसको असर जिल्लामा प्रत्यक्ष पर्ने अनुमान गरेका छौं ।’ गत निर्वाचनमा असहयोग गरेको भन्दै आचार्यसहित २६ जनालाई कारवाही गर्न खड्काले केन्द्रीय कमिटीमा सिफारिस गरेका थिए ।  

तर, इतर समूहका नेता शेखर कोइराला र महामन्त्री गगन थापालगायत भने खड्कालाई चुनाव जिताउन कम्मर कसेर लागेका छन् ।  महामन्त्री थापा दुईपटक यो क्षेत्रमा आएर मत चुनावी अभियानमा सामेल भए । २०८४ मा गठबन्धन नगरी चुनाव जिताउन सकिन्छ भनेर सन्देश दिने प्रमुख समय भएको नेताहरूको भनाइ छ । 

सभापति शेरबहादुर देउवालाई गठबन्धन चाहिँदैन, कांग्रेस एकलै चुनाव लड्न सक्छ भन्ने सन्देश दिने उनीहरूको तयारी छ । इलाममा कांग्रेस विभाजित छैन भन्ने सन्देश दिन पनि संस्थापन इतरका नेताहरूले इलाम–२ लाई प्राथमिकता दिएका छन्  । आचार्यलाई समेत केन्द्रीय सदस्य दिने आश्वासन सभापति देउवाले दिएको संस्थापन पक्षका नेताहरूले बताएका छन् । तर, आचार्यले भने आफूलाई कुनै पनि आश्वासन नदिएको बताएका छन् । केन्द्रीय सदस्य केशव बुढाथोकीको निधन भएपछि आचार्यलाई केन्द्रीय सदय बनाउने भनेर संस्थापन पक्षले प्रचार गरिरहेको छ । 

यसपटक आचार्यले चुनाव जिताए २०८४ मा डम्बरले दाबी नगर्ने सहमति भएको पनि उनी निकटका नेताहरू बताउँछन् । यसपटक कांग्रेस एक ढिक्का भएर चुनाव जित्ने पूर्वकेन्द्रीय सदस्य बेनुप प्रसाईँले बताए ।   

डम्बरले चुनाव प्रचारमा नानुका आचार्यलाई समेत प्रयोग गर्ने गरेका छन् । नानुका संसद् भवनअगाडि शरीरमा पेट्रोल लगाएर आत्महत्या गरेका प्रेम आचार्यकी श्रीमती हुन् । प्रेम आचार्य पनि इलामकै हुन् । कांग्रेसले सहयोग गरेको सन्देश दिन पूर्वस्वास्थ्य मन्त्री मोहन बस्नेतले नानुकालाई इलामसम्म ल्याएका थिए ।

यी पनि पढ्नुहोस् 

फरक सन्देश दिइरहेको इलामको उपचुनावः शालीन उम्मेदवार, शान्त मतदाता !

इलाम-२ उपचुनावः रास्वपालाई ‘सहकारी’ भारी, कांग्रेस-एमालेलाई 'मुढा'को चुनौती

इलाम-२ उपचुनाव: सहकारीका प्रश्नले घेरिन्छन् वाग्ले, तर्कीतर्की हिँड्छन् लामिछाने

इलामको चुनावी मैदानमा फरक देखिएका सुहाङ– बुवाकै शैली, मतदाता रिझाउने मिजास !

इलाम-२ उपनिर्वाचनः ‘मिसन ०८४’ हेरिरहेका दललाई आफ्नै शक्ति जाँच्ने अवसर

इलाम-२ उपचुनाव: प्रचारमा केन्द्रीय नेताको लर्को, नयाँ मतदाता अझै अन्योलमा