काठमाडौं– नयाँ शक्ति पार्टी नेपालले वाइडबडी विमान खरिदमा भएको अनियमितताबाट जोगिन सत्ता पक्ष र प्रतिपक्षबीच साँठगाँठ भइरहेको आरोप लगाएको छ ।

नयाँ शक्तिा पार्टी नेपालले बुधवार एक विज्ञप्ति निकाल्दै हवाई माफियाको साँठगाँठमा प्रमुख राजनीतिक पार्टीको नेतृत्वले जमानतको गलत प्रयोग गर्दै वाइडबडी विमान खरिदमा अनियमितता गरेको र त्यसबाट उम्किन सत्ता पक्ष र प्रमुख प्रतिपक्षबीच साँठगाँठ सुरु भएको आरोप लगाएको हो ।

नयाँ शक्तिपार्टीले  नेपाल सरकारले प्रदान गर्ने जमानतको गलत प्रयोग गरी निगमबाट दुई वटा वाइडबडी विमान खरिदका क्रममा ठुलो अनियमितता र भ्रषटाचार गरिएको र यसले नेपाल वायु सेवा निगम, कर्मचारी सञ्चयकोष र नागरिक लगानी कोषलाई डुबाउने प्रपन्च रचिएको ठहर गरेको छ ।

विमान खरिदमा भएको अनियमितताको विषयलाई गम्भीर विषयका रुपमा लिएर अनियमिततामा संलग्न जोकोहीलाई पनि कानुनी कठघरामा ल्याउन जरुरी रहेको नयाँ शक्ति पार्टी नेपालको ठहर छ ।

त्यस्तै विमान खरिदको सुरुवात नै गलत मनसायबाट भएको देखिएको पार्टीको ठहर छ ।

पार्टीले बुधवार जारी गरेको विज्ञप्तिमा विमान खरिद गर्न विमान नै नभएको कम्पनीले समेत प्रतिस्पर्धा गरेको र त्यसबाट गलत मनसायबाट विमान खरिद गरिएको स्पष्ट हुने उल्लेख गरिएको छ । ‘नयाँ विमान खरिद गर्न निगमको आर्थिक विनिमावलीको दाफा २३६को उपदफा १ को कार्यविधि अपनाएर खरिद गर्दा सिधै विमान निर्माता कम्पनीहरुको बीचमा प्रतिस्पर्धा गराउनु पर्नेमा सो नगरी दफा २३६को उपदफा २ को प्रावधान अनुसार पुरानो पुरानो विमान खरिद गर्ने प्रक्रिया अवलम्बन गरी विमाननै नभएको कम्पनीले समेत समेत प्रतिस्पर्धामा भाग लिने गरी नयाँ विमान खरिद गनै चोरबाटो प्रयोग गरिएको छ’ नयाँ शक्तिपार्टीको विज्ञप्तिमा उल्लेख गरिएको छ ।

त्यस्तै निगमले पहिला नै न्यारोबडी विमान खरिद गर्दा दफा २३६को १ अन्तरगत विमान निर्माता कम्पनीहरुबीच प्रतिस्पर्धा गराइएको स्थापित मार्गलाई परित्याग गरी विचौलिया खडा गर्नको लागि नै पुरानो विमान खरिद गर्ने दफा २३६को २ अन्तरगत प्रतिस्पर्धाको नाटक मन्चन गरिएको समेत नयाँ शक्ति पार्टीले जानकारी दिएको छ ।