अछाम – खप्तड राष्ट्रिय निकुञ्जमा गंगादशहरा मेलामा गएकी किशोरी ९ दिनदेखि बेपत्ता भएकी छन् ।

अछामको साँफेबगर नगरपालिका–१२ खप्तड भेरासैनकी १७ वर्षीया देवीकुमारी रोकाया बेपत्ता भएकी हुन् । 

रोकाया गत जेठ २८ गते रातिदेखि हराएकी हुन् । गाउँकै साथीहरूसँग मेला भर्न गएकी रोकाया बेपत्ता भएको उनका बुबा धनबहादुरले बताए । खप्तड राष्ट्रिय निकुञ्ज क्षेत्र र अन्यत्र खोजी गर्दा फेला नपरेको उनले बताए ।

किशोरीको खोजी भइरहेको अछामका प्रहरी नायव उपरीक्षक जनकबहादुर शाहीले बताए । उनी काडा भवानी मावि बाजुरामा कक्षा ९ मा अध्ययनरत रहेको रोकायाका काका रामबहादुर रावतले बताए ।