काठमाडौं–नेकपा सचिवालय बैठकमा वरिष्ठ नेता माधव कुमार नेपालले जनवर्गीय संगठनमा मनोनयनको विषयमा असन्तुष्टि जनाएका छन् । उनले पार्टीमा सन्तुलन मिलाउन केही नेतालाई सचिवालयमा ल्याउन पनि माग गरेका छन् । 
प्रधानमन्त्री निवास बालुवाटारमा आइतबार बसेको बैठकमा नेपालले भीम रावल, अष्ठलक्ष्मी शाक्य र युवराज ज्ञवालीलाई सचिवालयमा मनोनयन गनुपर्ने प्रस्ताव गरेका छन् । 

अहिले नेकपामा ९ जनाको सचिवालय रहेको छ । नेपालको प्रस्तावअनुसार तीन नेतालाई सचिवालयमा लगिए १२ जनाको टीम हुनेछ । अहिले सचिवालयमा दुई अध्यक्ष केपी शर्मा ओली र प्रचण्डसहित, माधव कुमार नेपाल, झलनाथ खनाल, नारायणकाजी श्रेष्ठ, रामबहादुर थापा, वामदेव गौतम, इश्वर पोखरेल र विष्णु पौडेल रहेका छन् । 

यस्तै नेपालले दुई जना अध्यक्षमध्ये एक जनाले पार्टी र अर्काले सरकारको नेतृत्व गर्नुपर्ने प्रस्ताव पनि गरेका छन् । 

यसअघि शुक्रबार बसेको बैठकमा नेकपाले ३३ वटा केन्द्रीय विभागको नेतृत्व गर्ने नेताहरूको टुंगो लगाएको थियो । 

पार्टीभित्र सबैभन्दा शक्तिशाली मानिने संगठन विभागको नेतृत्व सचिवालय सदस्य वामदेव गौतमले पाएका छन् ।

एकभन्दा बढी नेताको दाबीका कारण निर्णयमा पुग्न कठिन भएको स्कूल विभागको नेतृत्वमा भने ईश्वर पोखरेललाई नै ल्याइएको छ ।

पोखरेलको नाममा चर्चा भएपनि सहमति हुन सकिरहेको थिएन ।

यसका अलावा विदेश विभागको नेतृत्व वरिष्ठ नेता माधवकुमार नेपालले पाउँदा नीति तथा अध्ययन प्रतिष्ठानमा झलनाथ खनाललाई जिम्मेवारी तोकिएको छ ।

प्रचार विभागको जिम्मा नारायणकाजी श्रेष्ठ र अर्थ तथा योजना विभागको जिम्मा सुरेन्द्र पाण्डेले पाएका छन् ।

नेकपाले तोक्यो विभागहरूको नेतृत्व, ३३ विभागमा कुन-कुन नेतालाई जिम्मा ? [सूचीसहित]