काठमाडौं – शनिवार राति अफगानिस्तानको काबुलमा एक विवाह समारोहमा भएको आत्मघाती आक्रमणपछि दुलाहाले आफ्नो सबै आशा मरेको बताएका छन् । 

टोलो न्युजलाई दिएको एक अन्तर्वार्तामा मीरवाइज इल्मीले आक्रमणमा आफू त बाँचेको तर मारिएका ६३ जनामा आफ्ना अनेकौं नातेदार परेको बताए । 

आक्रमणमा लगभग १८० जना घाइते भएका छन् । घटनाको जिम्मेवारी आतंकवादी संगठन इस्लामिक स्टेटले लिएको छ । 

राष्ट्रपति अशरफ गानीले यो बर्बर आक्रमण भएको बताएका छन् । तालिबाले उग्रवादीहरूलाई मञ्च दिएको आरोप उनले लगाएका छन् । 

अमेरिकासँग शान्तिवार्ता गर्ने तालिबानले आक्रमणको आलोचना गरेको छ । 

इल्मीले बिहेको दिन आफू खुशी रहेको र भेट्न आएका नातेदारसँग मेलजोल गरिरहेको बताए । बिहे भइरहेको हल खचाखच भरिएको थियो । तर केही घन्टापछि नै त्यहाँ लाशै लाश भए । 

उनले भने, ‘मेरो परिवार र दुलहीको परिवार स्तब्ध छन् । उनीहरू कुरा गर्न सक्ने स्थितिमा छैनन् । मेरी दुलही घरिघरि बेहोश भइरहेकी छ ।’

‘मेरो त सबै आशा नै टुटेको छ । मेरा भाइ मारिए । मेरा साथी र नातेदारहरूको मृत्यु भयो । म जिन्दगीमा फेरि कहिले पनि खुशी हुन सक्दिनँ ।’

‘अन्तिम संस्कारमा जाने हिम्मत समेत मसँग छैन । म एकदमै थाकेको अनुभव गर्दैछु । हामी अफगानहरूले अझै पनि यस्ता दुःख देख्न बाँकी छ ।’

दुलहीका पिताले आफ्नो परिवारका १४ जना मारिएको बताए । 

इस्लामिक स्टेटले एक बयान जारी गरेर आफ्नो एक लडाकूले भीडको बीचमा गएर आफूलाई उडाएको बताए । 

यो विस्फोट गरिएको स्थान शियाबहुल क्षेत्र हो । 

अफगानिस्तान र पाकिस्तानमा तालिबान र इस्लामिक स्टेटका सुन्नी मुसलमान लडाकूहरूले अल्पसंख्यक शिया हजारा मुसलमानमाथि आक्रमण गर्ने गरेका छन् । 

विवाह समारोहमा सहभागी २३ वर्षीय मुनीर अहमद अहिले अस्पतालमा छन् । उनले टाढाको भाइ पर्ने एकजना आक्रमणमा मारिएको बताए । 

समाचार संस्था एएफपीलाई उनले बताए, ‘विस्फोट हुनुअघि मानिसहरू नाचेर खुशियाली मनाइरहेका थिए । विस्फोट भएपछि भागाभाग भयो । सबैतिरबाट कराएको र रोएको आवाज आइरहेको थियो । मानिसहरू आफन्तलाई खोजिरहेका थिए ।’

अफगानिस्तानमा बिहेहरू प्रायः ठूलो हलमा हुने गर्छन् अनि पुरुष र महिला पाहुनालाई बेग्लाबेग्लै ठाउँमा राखिन्छ ।

तालिबानका एक प्रवक्ता जबिउल्ला मुजाहिदले भने, ‘जानाजान महिला र बच्चाहरूलाई तारो बनाएर गरिएको बर्बर आक्रमणका बारेमा कुनै पनि सफाइलाई स्वीकार गर्न सकिँदैन ।’

अमेरिका र तालिबान प्रतिनिधिबीच दोहामा शान्तिवार्ता चलिरहेको बेलामा यो आक्रमण भएको हो । दुवै पक्षले कुराकानी सकारात्मक ढंगले अघि बढिरहेको बताएका छन् । 

नाटो मिसनअन्तर्गत अमेरिकाका लगभग १४ हजार सैनिक अफगानिस्तानमा तैनाथ छन् । ट्रम्पले अफगानिस्तानबाट अमेरिकी सैनिक फिर्ता बोलाइने लगातार बताउँदै आएका छन् । 

शान्ति सम्झौता अनुसार अमेरिकाले चरणबद्ध रूपमा सैनिक फिर्ता बोलाउनेछ तर तालिबानले अमेरिकी अड्डाहरूमा उग्रवादीबाट हुने आक्रमण रोक्ने सुनिश्चितता गर्नुपर्ने प्रत्याभूति गर्नुपर्नेछ ।

बीबीसी हिन्दीबाट