ट्रम्पको गाडी आउँदा झुपडपट्टी लुकाउने भारत सरकारको निर्णय, दास मानसिकताको आरोप

भारत भ्रमणमा आउन लागेका अमेरिकाका राष्ट्रपति डोनल्ड ट्रम्पलाई स्वागत गर्ने क्रममा उनको गाडी हिँड्ने रूटमा रहेका झुपडपट्टीलाई भारत सरकारले पर्खाल लगाएर लुकाउने निर्णय सार्वजनिक भएपछि शिवसेना पार्टीले त्यसको आलोचना गरेको छ । 

बेलायती राजारानीहरूले उपनिवेशकालमा भारत भ्रमण गर्दा यस्तै किसिमको तयारी गर्ने गरिन्थ्यो र यो दास मानसिकता हो भनी शिवसेनाको पत्रिका सामनामा लेखिएको छ । 


Advertisement

अहमदाबादका अधिकारीहरूले स्थानीय झुपडपट्टी ट्रम्पले नदेखून् भनी पर्खाल लगाउने योजना बनाएका छन् । ट्रम्प र उनको टोली फागुन १२ गते अहमदाबाद पुग्नेछन् । उनले भारतका प्रधानमन्त्री नरेन्द्र मोदीसँग रोडशो गर्नेछन् र एक नयाँ क्रिकेट स्टेडियमको उद्घाटन पनि गर्नेछन् । 

यसरी झुपडपट्टी लुकाउँदा अमेरिकाका राष्ट्रपतिलाई बादशाह जस्तो देखिने पत्रिकामा लेखिएको छ । 


Advertisement

सामनाको सम्पादकीयमा लेखिएको छ, ‘ट्रम्प अहमदाबादमा जम्मा तीन घन्टा बस्नेछन् तर पर्खाल बनाउन लगभग एक अर्ब भारु खर्च गरिँदैछ ।’

पत्रिकाले मोदीको दल भाजपामाथि पनि व्यंग्य कस्दै इन्दिरा गान्धीको गरीबी हटाओ नारालाई गरीबी छुपाओले प्रतिस्थापन गरेको लेख्यो । 

अमेरिकी राष्ट्रपतिका रूपमा पहिलोपटक भारत भ्रमण गर्न लागेका ट्रम्प नयाँ दिल्ली र गुजरात जानेछन् । 

अहमदाबादमा ट्रम्पलाई रातो कार्पेट ओछ्याएर स्वागत गरिनेछ । पोहोर साल अमेरिकाको टेक्ससमा हाउडी, मोदी कार्यक्रम गरिएजस्तै ट्रम्पको स्वागतमा केम छो ट्रम्प कार्यक्रम पनि आयोजना गरिनेछ ।

एजेन्सी
एजेन्सी

लेखकबाट थप...

कमेन्ट गर्नुहोस्