पोखरामा १८ औं आहा रारा गोल्डकप शुरू, आयोजक सहारा ३–२ ले विजयी

मोफसलको प्रतिष्ठित क्लब सहारा क्लब पोखराले बिहीबारदेखि पोखरा रंगशालामा १८ औं आहा रारा गोल्डकप फुटबल प्रतियोगिता सुरु गरेको छ ।

कोरोना भाइरस संक्रमण त्रासबीच पनि सुरु प्रतियोगिताको गण्डकी प्रदेश मुख्यमन्त्री पृथ्वीसुव्वा गुरुङले उद्घाटन गरे ।

उनले खेलकुदको विकासका लागि गण्डकी सरकारले सक्दो सहयोग गर्ने बताए । जिल्ला प्रशासन कास्कीले सामूहिक रुपमा भेला, मेला, महोत्सव नगर्न सूचना जारी गरेको भोलिपल्टै पोखरा रंगशालामा सुरु प्रतियोगितामा बोल्दै मुख्यमन्त्रीले कोरोना त्रास भनेर बस्नुभन्दा पनि आ–आफ्नो ठाउँबाट सचेतना फैलाउनुपर्ने बताए ।

उनले आहा रारा सफल पार्नुपर्ने पनि उद्घोष गरे । १० टिम सहभागी प्रतिष्पर्धाको उद्घाटन खेल आयोजक सहारा क्लब पोखराले जित्दै विजयी यात्रा सुरुवात ग¥यो । ८० मिनेटसम्म १० खेलाडीबीच ब्रिगेड ब्वाइज क्लब (बीबीसी) सँगको प्रतिष्पर्धामा अन्ततः सहाराले ३–२ गोलअन्तरले जित हासिल गरेको हो ।

निर्धारित ९० मिनेटको खेल समान २–२ गोलमा टुंगिएकोमा अतिरिक्त समयको अन्तिम मिनेटमा सहाराका लागि त्रिदेव गुरुङले सुन्दर गोल गर्दै सहारालाई जित दिलाएका हुन् । खेलको २६ मिनेटमा दोहोरो पहेंलो कार्ड पाउँदै सहाराका जीवन रायमाझीले मैदान छाडेका थिए ।

दुवै टिमले पहिलो हाफ गोलरहित बराबरी खेले । अतिरिक्त समयअघि सहाराका लागि त्रिदेव सहित विदेशी खेलाडी सीवी वीरिचले गोल गरेका थिए भने बीबीसीका लागि राजेश परियार र विजय गुरुङले गोल गरेका हुन् । सहाराले अब नेपाल पुलिससँग २४ फागुनमा क्वाटरफाइनल खेल्नेछ । शुक्रबार नेपाल एपीएफ क्लब र झापा–११ फुटबल क्लबीच प्रतिष्पर्धा हुनेछ ।

पोखरा रंगशालामा १ चैतसम्म हुने सो प्रतियोगितामा रुस्लान थ्री स्टार क्लब, त्रिभुवन आर्मी क्लब, नेपाल आयाल निगम मनाङ मस्र्याङ्दी क्लब, नेपाल पुलिस क्लब, नेपाल एपीएफ क्लब, संकटा क्लब, झापा–११ फुटबल क्लब, भारतको गान्तोक सिटी फुटबल क्लब, ब्रिगेड ब्वाइज क्लब र आयोजक सहारा प्रतिष्पर्धामा छन् । लिगविजेता मच्छिन्द्र क्लबको भने सहभागिता छैन ।

क्लबले यसपालि पुरस्कार राशिमा वृद्धि गरेको छ । विजेताले १० लाख १ हजार र उपविजेताले ५ लाख १ हजार रुपैयाँ पाउने छन् । गत संस्करण तुलनामा विजेताको लागि २ लाख र उपविजेताको लागि १ लाख रुपैयाँ पुरस्कार वृद्धि गरिएको प्रतियोगिता मूल आयोजक समिति संयोजक एवं क्लब अध्यक्ष केशवबहादुर थापाले जानकारी दिए । प्रतियोगिताबाट १ करोड १८ लाख रुपैयाँ आम्दानी र ९९ लाख ३८ हजार रुपैयाँ खर्च हुने आयोजकको अनुमान छ ।

यस्तै, सर्वोत्कृष्ट राष्ट्रिय फुटबल खेलाडी सम्मानबाट सुजल श्रेष्ठलाई आयोजकले नगद ३५ हजार सहित सम्मान गरेको छ । मुख्य प्रायोजक हिमश्री फुड्स प्रालिका कार्यकारी अध्यक्ष सूर्यबहादुर केसीले फुटबल खेलको विकासको लागि आफूले सधैँ सहयोग गरिरहने प्रतिबद्धता व्यक्त गरे ।

२०५५ सालमा पोखरामा स्थापित मोफसलको चर्चित सहारा क्लब फुटबल मार्फत सामाजिक सेवामा सक्रिय रहँदै छ । क्लबले सहारा एकेडेमी संचालन गरी हाल तेस्रो ब्याचको रुपमा १४ जिल्लाका २४ बालकलाई फुटबल प्रशिक्षणसहित आवासीय सुविधा एवं शिक्षादीक्षा प्रदान गर्दैआएको क्लब महासचिव रामजीप्रसाद अधिकारीले जानकारी दिए ।

प्रतियोगितालाई सुरु संस्करणदेखि हिमश्री फुड्स प्रालिको उत्पादन आहा तथा रारा चाउचाउले मुख्य प्रायोजन गर्दैआएको छ । गत संस्करणको विजेता रुस्लान थ्रीस्टार र उपविजेता त्रिभुवन आर्मी हुन् ।