राष्ट्रपति ट्रम्प रिसाएपछि विश्व स्वास्थ्य संगठनको सहयोग रोक्का

कोरोना भाइरस संक्रमण फैलिन नदिन विश्व स्वास्थ्य संगठन (डब्लूएचओ) असफल भएको गम्भीर आरोप लगाउँदै अमेरिकी राष्ट्रपति डोनाल्ड ट्रम्पले सहयोग रोक्का गरेका छन् ।

कोरोना रोकथाम गर्न नसकेर डब्लूएचओले न्यूनतम दायित्व पूरा गर्न नसकेको बताउँदै ट्रम्पले सहयोग रोक्ने अमेरिकी प्रशासनलाई निर्देशन दिएका छन् ।

चीनको वुहानमा कोरोना भाइरस देखिएपछि सही ढंगले व्यवस्थापन गर्न नसकेको र घटनालाई ढाकछोप गरेकाले संसारभर फैलिएको ट्रम्पको आरोप छ ।

‘कोरोना भाइरस संक्रमण फैलिने विषयलाई एकदमै नराम्रो ढंगले व्यवस्थापन गरेको र ढाकछोप गरेको विषयमा समीक्षा भइरहँदा आर्थिक सहयोग रोक्न म आफ्नो प्रशासनलाई निर्देशन दिँदैछु,’ ह्वाइट हाउसमा आयोजित पत्रकार सम्मेलनमा राष्ट्रपति ट्रम्पले भनेका छन् ।

ट्रम्पले साझा संगठनको रुपमा रहेको डब्लूएचओलाई जवाफदेही बनाउनुपर्नेमा समेत जोड दिएको अन्तर्राष्ट्रिय सञ्चारमाध्यमले जनाएका छन् । डब्लूएचओलाई अमेरिकाले सबैभन्दा बढी आर्थिक सहायता उपलब्ध गराउँदै आएको थियो ।

अमेरिकामा कोरोना भाइरस सबैभन्दा ठूलो महामारीको रुपमा फैलिँदै गएको छ । बुधवार बिहानसम्म अमेरिकामा कोरोना संक्रमणका कारण २५ हजार ७५७ जनाले ज्यान गुमाएका छन् भने ६ लाख ५ हजार १९३ जना संक्रमित देखिएका छन् ।