पश्चिम नवलपरासीको  सरावल गाउँपालिका भूजहवास्थित सशस्त्र प्रहरी बल नेपाल बिओपी स्थायी पोष्टमाथि सोमबार आक्रमण भएको छ । यो गाउँपालिका भारतसँग सिमाना जोडिएको छ । 

आक्रमण गर्ने भारतबाट अवैध रुपमा नेपालतर्फ विभिन्न सामान ओसारपसार गर्ने कारोबारी रहेको सशस्त्र प्रहरी पश्चिम नपलपरासीले जनाएको छ ।

धानको बीउ किन्न सीमावर्ती भारतीय बजारमा जान पाउनु पर्ने निउँ निकालेर उनीहरुले पोष्टमाथि ढुंगामुडासहित आक्रमण बताइएको छ ।

ढुंगामुडा गर्ने अधिकांश व्यक्ति विगतमा भारतबाट अवैध सामान भित्राउने कारोबारीहरु रहेको स्थानीयले बताएका छन् । ५०/६० जनाको समूहले बिऊको बहाना निकालेर पोष्टमाथि ढुंगामुढा गरेको सशस्त्र प्रहरी बल नेपाल नं. २६ हेड क्वाटर पश्चिम नवलपरासीका उपरीक्षक भरत खनियाँले बताए । ‘बीऊको बहाना मात्र हो, उनीहरु विगतमा अवैध सामान ल्याउने पृष्ठभूमिका हुन्,’ खनियाँले भने । 

ढुंगामुढा हुँदा सरावल गाउँपालिकाका अध्यक्ष राधेश्याम चौधरी समेत पोष्टमा थिए । उनी सीमा क्षेत्रको अवलोकन गरेर थप जानकारी लिन पोष्ट पुगेका थिए । अध्यक्ष आएको देखेपछि केही व्यक्तिहरु बीऊ किन्न भारत जानका लागि सशस्त्रले रोकेको भन्दै आक्रोश पोखेका थिए ।

ढुंगामुढा हुन थालेपछि सशस्त्र प्रहरीले लाठी चार्ज गरी भीडलाई तितर-वितर पारेको थियो । जिल्लाका किसानहरुले हाइब्रिड धानको बीउ लगाउने गरेका छन् ।

हाइब्रिड बीऊ नेपालमा उपलब्ध नहुने भएकाले विगतमा किसानहरु भारतीय बजार जाने गरेका थिए । बीऊको बहाना निकालेर कारोबारीहरुले पोष्टमा ढुंगामुढा गरेको सशस्त्र प्रहरीले जनाएको छ ।