कर्णाली प्रदेशमा लकडाउनको अवस्थामा जनप्रतिनिधि कुटिने श्रंखला रोकिने नामै लिएको छैन । कालिकोटको पलाँता गाउँपालिका अध्यक्ष लक्ष्मणबहादुर बम वडा अध्यक्षको कुटाइबाट बैशाख २७ गते घाइते भएका छन् । पलाँता गाउँपालिका–२ नं. वडा वडा अध्यक्ष मानबहादुर भण्डारीले गाउँपालिका अध्यक्षलाई कुटेर घाइते बनाएको आरोप लागेको छ । 

पलाँता गाउँपालिका–२ को ग्रामिण सडक योजनाको उपभोक्ता समिति गठन गर्ने क्रममा वडा अध्यक्ष भण्डारी, नेपाल कम्युनिष्ट पार्टी (नेकपा)का गाउँपालिका अध्यक्ष विष्णु रोकाया र स्थानीय नेकपा नेता धनीराम भण्डारीले गाउँपालिका अध्यक्ष बमलाई कुटपिट गरेको कर्णाली प्रदेश प्रहरी कार्यालय प्रवत्ता लोकनाथ तिमिल्सेनाले पुष्टि गरे ।

यही बैशाख ९ गते जाजरकोटको जुनीचाँदे गाउँपालिकाको वडा नं. २ का वडाध्यक्ष रामबहादुर नेपालीे कार्यकक्षमै कुटिए । स्थानीय जयबहादुर नाथ, उनका भाइहरु मेहन्द्र नाथ, सुरेन्द्र नाथ, धनबहादुर नाथ, बिर्खबहादुर नाथ, रेशमबहादुर नाथ र नरु नाथले वडाध्यक्षमाथि मरणासन्न हुनेगरी कुटे । कुटपिटपछि पक्राउ परेका उनीहरुले आफ्नो गाउँमा पानीको योजना नदिएकाले वडाध्यक्षमाथि कुटपिट गरेको बयान दिएका छन् ।

त्यस्तै बैशाख १३ गते जाजरकोटकै भेरी नगरपालिकाका प्रमुख चन्द्रप्रकाश घर्तीमाथि आफ्नै कार्यकर्ताबाट आक्रमण भयो । साविकको पुन्मा गाविसका अध्यक्ष मधु चन्दको मृत्युपछि मलामी गएका मेयर घर्तीलाई सत्तारूढ नेकपाको युवा संघ जाजरकोटका संयोजक दीपेन्द्र शाहीको समूहले आक्रमण गर्‍यो । नेकपाको कर्णाली प्रदेश समितिका सदस्यसमेत रहेका मयेर घर्तीले विकासका योजना नदिएको झोकमा शाहीको समूहले आक्रमण गरेको हो ।

आक्रमणपछि मेयर घर्ती घाइते भए । नेकपाको राष्ट्रिय युवा संघले एक विज्ञप्ती जारी गर्दै संयोजक शाहीलाई निलम्बन गरेको बतायो ।
बैशाख १७ गते एकैदिन हुम्लाको सर्केगार्ड गाउँपालिका–५ का वडाध्यक्ष कर्णजंग शाही र कालिकोटको पचालझरना गाउँपालिकाको वडा नं. १ का वडा अध्यक्ष रत्नलाल न्यौपाने कुटिए । शाही कार्यपालिकाको बैठकमै प्रमुख प्रशासकीय अधिकृत रुद्रबहादुर शाहीबाट र न्यौपानेमाथि स्थानीय उमेश न्यौपाने नेतृत्वमा रहेको समूहबाट कुटिए । वडाध्यक्ष शाही र कार्यकारीबीच गतवर्ष वडाको भवन निर्माणको विषयलाई लिएर पहिलेदेखि नै विवाद हुँदै आएको थियो ।
वडा अध्यक्ष शाहीले गाउँपालिकाका कर्मचारीहरु हिटलरको जस्तो शासन गर्न थाले भन्दै फेसबुकमा स्टाटस लेखेका थिए । यता कालिकोटमा भएको घटनापछि २० वर्षीय पारस न्यौपाने, २१ वर्षीय उमेश न्यौपाने, २२ वर्षिय तिलक न्यौपाने, २० वर्षिय जनक न्यौपाने र १९ वर्षिय कमल न्यौपाने पक्राउ परेका छन् । घाइते वडाध्यक्षको अहिले काठमाडौंमा उपचार भइरहेको छ ।

जुम्लाको हिमा गाउँपालिकाका उपाध्यक्ष हिमाली रोकायामाथि बैशाख १२ गते कार्यपालिकाको बैठकमै कर्मचारीबाटै दुव्र्यवहार भयो । कर्मचारीबाटै अभद्र व्यवहार भएपछि यपाध्यक्षले कारवाहीको माग गर्दै प्रहरीमा उजुरी दिएकी छन् । गाउँपालिकाका प्रमुख प्रशासकीय अधिकृत टोपबहादुर बुढाले आफूमाथि अभद्र व्यवहार गरेको भन्दै रोकायाले उजुरी दिएकी हुन् । अधिकृत बुढाले आफूलाई हैसियत नभएकी, अनपढ, नक्कली उपाध्यक्ष लगायतका अपशब्द प्रयोग गरी अभद्र व्यवहार गरेको उपाध्यक्ष रोकायाको जाहेरीमा लेखेकी छिन् ।

हालै भएका यस्ता घटनाले मुख्यगरी विकास निर्माण र योजना बाँडफाँडमा हुने विवादले आक्रमण हुने गरेको पाइएको छ । 
देशमा कानुनी शासनको अभाव हुँदा आफूहरुमाथि आक्रमण हुन थालेको जनप्रतिनिधिहरु बताउँछन् । कानुनी शासनको अभाव, कर्मचारी र जनप्रतिनिधिबिच तालमेल र समन्वय नहुनु र राजनीतिक प्रतिशोधका कारण पनि जनप्रतिनिधिमाथि आक्रमणका घटना बढेको गाउँपालिका महासंघ कर्णाली प्रदेशका संस्थापक अध्यक्ष कविन्द्रकुमार केसी बताउँछन् ।

‘अपराधिक मानसिकता, पुरानो रिसराग र युवापुस्तामा मानवीयताको कमीका कारण यस्ता घटना बढेको हुनसक्छ,’ उनले भने, ‘यद्यपी अनुसन्धानपछि मात्रै घटनाको वास्तविकता पत्ता लाग्ला ।’ उनले लामो समयसम्म कर्मचारीले जनप्रतिनिधिको काम गरेको हुँदा निर्वाचित जनप्रतिनिधि र कर्मचारी बीचको तालमेल नहुँदा पनि जनप्रतिनिधि र कर्मचारीबीच खटपट हुन थालेको उनको भनाइ छ । विधि र नियमलाई सबैले मानेमा यस्ता घटनाहरु आफै कम हुने उनले बताए ।
नेपाल नगरपालिका महासंघ कर्णाली प्रदेशका संयोजक रत्नबहादुर खड्काले कानूनी राज्यमा कानून हातमा लिई कुटपिट गर्नु अराजकता भएको बताए । ‘कसैले कानून सम्मत काम नगरेको, विधिको शासन अवलम्बन नगरेको, सुशासन कायम नगरेको भए कानूनी उपचार खोज्न सकिन्छ । हरेक नागरिकलाई सूचनाको हक छ । भ्रष्टाचार भयो, योजना गुणस्तर भएन भने अख्तियारमा जान सकिन्छ,’ उनले भने, ‘तर जथाभावी कुटपिट गर्दै हिडने काम निन्दनीय काम हो । त्यस्तालाई कानूनी कठघरमा उभ्याउनु पर्छ  ।’

लकडाउनका बेलामा नागरिकको मन जितिरहेका कारण पनि कतिपय स्थानमा जनप्रतिनिधि तारो बनिरहेको उनको भनाई छ । ‘बन्दाबन्दीको अवस्थामा निर्वाचित प्रतिनिधिले नागरिकहरुलाई भोकै मर्न दिनु हुन्न । दैनिक ज्यालादारी गर्न नपाएका कारण उनीहरु समस्यामा छन् । नागरिकलाई भोकै बस्न नदिने परिभाषित जिम्मेवारी हामीले बोकेका कारण केहि व्यक्तिको चित्त दुखेको हुनसक्छ,’ उनी भन्छन्, ‘जनताको जनमत बटुल्ने भए भन्ने त्रासका कारण पनि आक्रामण भइरहेको छ । सबै घरदैलोमा पुगेका छन् । उहाँहरुको लोकप्रियता बढदै गएको छ विरोध गर्ने अवस्था नभएका कारण आक्रमणमा परेका छन् ।’

यसरी आफसमा कुटपिट गर्नु वा कसैले कुटपिट गर्नु स्थानीय सरकार कमजोर बनाउने खेल भएको उनको भनाई छ । ‘एकले अर्कोलाई आक्रमण गर्ने, हिलो छ्याप्ने, नेतृत्वबीच विवाद भए गन्तब्यमा ढिलाई होला । जनतामा गलत सन्देश जाला । स्थानीय सरकार राम्रो काम गर्न लागिरहनुपर्छ ।’