श्यामशरण लेख्छन्– नेपालमा अमेरिकाले सिधै खेल्न थाल्यो, भारत किनारा लाग्ने खतरा !

केपी ओली सरकारले संसद् विघटन गरेर ताजा निर्वाचनको घोषणा गरेपछि सत्तारूढ नेपाल कम्युनिस्ट पार्टी विभाजनको संघारमा पुगेको विषयमा भारतका पूर्व विदेशसचिव श्याम शरणले टिप्पणी गरेका छन् । 

भारतबाट प्रकाशित हुने द ट्राइब्यून पत्रिकामा प्रकाशित अन्फोल्डिङ क्राइसिस इन नेपाल शीर्षकको उनको लेखमा भारत नेपालमा असान्दर्भिक हुने खतरा रहेको उल्लेख गरिएको छ ।

उनले लेखेका छन् :

अहिलेको संकट निम्तिनुमा अमेरिकाको हात रहेको सुनिएको छ । त्यसो हो भने नेपालमा अमेरिका र चीनबीचको शक्तिको खेलमा भारत किनारामा पर्ने खतरा बढेर गएको छ । तिब्बतका विषयमा चीनको कमजोरीमा खेल्न नेपाललाई उपयोग गर्न सकिने विश्वास अमेरिकाले लिएको हुन सक्छ । 

त्यसो हो भने चीन त्यसलाई रोक्नका लागि जे पनि गर्न बाध्य हुन्छ । अमेरिकी एजेन्डामा रही भारतले काम गरेको भन्ने चीनलाई अनुभव भएमा भारतप्रति उसको शत्रुता थप चर्किनेछ । 

नेपालमा अमेरिकी स्वार्थ हावी भएको हो भने भारतको स्वार्थसँग त्यो मिल्न सक्दैन । विगतमा भारतले नेपालमा अमेरिका र बेलायतसँग मिलेर काम गरेको भए पनि भारत जहिले पनि नेतृत्वमा रहन्थ्यो । तर अहिले अमेरिकाले नेपालमा खेलिने खेलको नेतृत्व गरेको हो भने भारत किनारीकृत हुनेछ । 

नेपालमा चीनले भारतमाथि तेर्स्याएको चुनौतीलाई सामना गर्नका लागि भारतले नेपालसँगको विशिष्ट सम्बन्धका रूपमा रहेको पूँजी उपयोग गर्नुपर्छ । चीनसँग त्यस्तो पूँजी छैन । 

नेपालको आर्थिक तथा सामाजिक विकासमा भारत नै इच्छाइएको साझेदार बन्न सकेमा भारतले आफ्नो बलियो उपस्थिति जनाउन सक्छ । नेपाल ठूला शक्तिहरूको संघर्षको थलो बनेमा त्यसले भारतको हित गर्ने छैन र सानातिना फाइदाका लागि भारतले यसो हुन दिनु हुँदैन ।

ओलीमाथि संसद् विघटनको निर्णय फिर्ता लिन तथा नेतृत्वमा परिवर्तन स्वीकार गर्न दबाब दिइएको सुनिएको छ ।

उनलाई राजीनामा दिन लगाएर विवादरहित राजनीतिकर्मीलाई प्रधानमन्त्री बनाउन खोजिएको छ । 

ओलीले यसको पक्का प्रतिकार गर्नेछन् । अहिलेको यो संकट कसरी समाधान हुन्छ भनी हामी पर्ख र हेरको स्थितिमा रहनुपर्छ ।