प्रधानमन्त्री केपी शर्मा ओलीले वर्तमान सरकार संविधानको धारा ७६ को (१) अनुसारको भएको दाबी गरेका छन् ।

कुनै कालखण्डमा ७६ को (२) अनुसार बनेको भएपनि दुईवटा पार्टी एकीकरण भएपछि आफू सर्वसम्मत संसदीय दलको नेता बनेकाले सरकार धारा ७६ (१) मा परिणत भएको ओलीको दाबी छ । 

आइतवार राष्ट्रिय सभा बैठकमा नेपाली कांग्रेसका सांसद रमेशजंग रायमाझीले सोधेको एक प्रश्नको जवाफमा ओलीले आफू एउटै दलको बहुमतको प्रधानमन्त्री भएको बताए ।

फागुन ३ गते सरकार बन्दा दुई वा दुईभन्दा बढी दलको समर्थनमा बनेको भएपनि पार्टी एकतापछि परिस्थिति बदलिएको ओलीको जिकिर छ ।

‘जब दुई दल मिलेर एउटै संसदीय दलको नेता बनाए, त्यो सरकार संविधानको धारा ७६ (१) अनुसार भयो, फेरि पनि दोहोर्‍याएर भन्न चाहन्छु, यो सरकार संविधानको धारा ७६ (१) अनुसारकै हो । दलहरू मिलेर अर्को परिस्थिति बनिसक्यो । एक दलको बहुमतको सरकार बनिसक्यो । पुराना कुरा भनेर हुँदैन । चुनाव लडेको समयमा मैले नेतृत्व गरेको दल विपक्षमा थियो, त्यो कुरा भनेर हुन्छ ?’ ओलीले भने ।

प्रधानमन्त्री ओलीले प्रतिनिधि सभा विघटनको दिनसम्म नै आफू बहुमतप्राप्त दलको संसदीय दलको नेता रहेको बताए ।

‘पार्टी एकतापछि एउटै दलको बहुमतको सरकार बन्यो, एकै दलको बहुमतको सरकार होइन र ? तर्कलाई कुतर्कमा लैजान मिल्छ ? सरकार संविधानको धारा ७६ को उपधारा (१) बमोजिमको सरकार हो । मैले संसद् विघटनको सिफारिश गर्दासम्म बहुमतप्राप्त दलको संसदीय दलको नेता हुँ, यसमा भ्रममा अनि अलमलमा नपरौं ।’

त्यसअघि कांग्रेस सांसद रायमाझीले ओलीको सरकार संविधानको धारा ७६ को (२) अनुसारको भएको दाबी गर्दै संसद् विघटन गलत भएको बताएका थिए । 

संविधानको धारा ७६ को (१) मा ‘राष्ट्रपतिले प्रतिनिधि सभामा बहुमतप्राप्त दलको संसदीय दलको नेतालाई प्रधानमन्त्री नियुक्त गर्नेछ र निजको अध्यक्षतामा मन्त्रिपरिषद गठन हुनेछ’ भन्ने उल्लेख छ ।

यस्तै उपधारा (२) मा ‘उपधारा १ बमोजिम प्रतिनिधि सभामा कुनैपनि दलको स्पष्ट बहुमत नरहेको अवस्थामा प्रतिनिधि सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधि सभाको सदस्यलाई राष्ट्रपतिले प्रधानमन्त्री नियुक्त गर्नेछ,’ भन्ने उल्लेख छ ।