पौडीकी गौरीका सिंह र करातेका मण्डेकाजी श्रेष्ठले नेपाल खेलकुद पत्रकार मञ्चले आयोजनाको गरेको ‘एनएसजेफ पल्सर स्पोर्टस् अवार्ड’मा वर्षको उत्कृष्ट पुरुष तथा महिला खेलाडीको अवार्ड जितेका छन् ।

विक्रम संवत् २०७६ सालमा राष्ट्रिय तथा अन्तर्राष्ट्रिय खेलकुद प्रतियोगितामा गरेको प्रदर्शनका आधारमा दुवै जना उत्कृष्ट खेलाडीका रूपमा घोषित भएका हुन् ।

गौरीकाले करातेकी अनु अधिकारी, तेक्वान्दोकी आयशा शाक्य, एथलेटिक्सकी सन्तोषी श्रेष्ठ तथा ट्रायथलनकी सोनी गुरुङलाई पछि पार्दै उत्कृष्ट खेलाडीको अवार्ड जितेका हुन् । गौरीकाले १३ औं दक्षिण एशियाली खेलकूद (साग) मा ४ स्वर्ण, २ रजत र ३ कास्य पदक गरी ९ पदक जितेकी थिइन् । उनले सागमा सर्वाधिक स्वर्ण जित्ने तेक्वान्दोका दीपक विष्टको कीर्तिमानसँग बराबरी गरेकी थिइन् । गौरीकाले आठौं राष्ट्रिय खेलकूदमा १२ स्वर्ण पदक जितेकी थिइन् ।

गौरीकाले कम उमेरमा ओलम्पिक खेल्ने कीर्तिमान समेत बनाएकी थिइन् । उनले जापानको टोकियो ओलम्पिक खेल्ने पक्का भइसकेको छ ।

मण्डेकाजीले गल्फका सुवास तामाङ, तेक्वान्दोका कमल श्रेष्ठ, एनलेटिक्सका गोपीचन्द्र पार्की तथा फुटबलका विकेश कुथुलाई उछिन्दै उक्त अवार्ड जितेका हुन् । यी सबै खेलाडीले गत वर्ष नेपालमा सम्पन्न १३ औं दक्षिण एशियाली खेलकूद (साग) मा स्वर्ण पदक जितेका थिए ।

प्रतियोगितामा मण्डेकाजीले करातेतर्फ टीम काता र एकल गरी दुई स्वर्ण पदक जितेका थिए । उनले आठौं राष्ट्रिय खेलकुदमा एकल कातामा स्वर्ण तथा टीम कातामा रजत जितेका थिए । – विक्रम गिरी/रासस