बैतडीकी भागरथी भट्टको बलात्कारपछि हत्या गर्ने व्यक्ति सनातन माध्यमिक विद्यालयमै कक्षा ११ मा पढ्ने युवक दिनेश भट्ट भएको प्रहरीले पुष्टि गरेको छ । 

ती युवकले भागरथीको बलात्कार पछि हत्या गरेको स्विकारेसँगै बुधवार ११ बजे उनलाई सार्वजनिक गर्ने तयारी भएको एसएसपी  मुकेश सिंहले लोकान्तरलाई जानकारी दिए  । 

 भागरथी सनातन माध्यमिक विद्यालयको कक्षा १२ मा पढ्ने गर्थिन् । प्रहरीले सोही विद्यालयमा   कक्षा ११ मा अध्ययनरत भट्टले अपराध स्वीकार गरेको दावी गरेको हो ।

प्रहरी स्रोतका अनुसार, भागरथीको हत्या गर्न  पहिले नै योजना बनाएको र योजना अनुसार नै हत्या गरिएको युवकले बयान दिएका छन् । 

 माघ २१ गते विद्यालयबाट घर फर्कने क्रममा स्थानीय लवलेक जङ्गलमा भागरथीको हत्या भएको थियो ।

माघ २१ गते साँझसम्म पनि घर नफर्केपछि खोजी शुरू गरेका परिवारले माघ २२ गते साँझ ५ बजे मात्रै भागरथीको शव लवलेक जङ्गलको बाटोभन्दा करिब ७० मिटर तल बनमाराको झाडीभित्र फेला पारेका थिए ।

 दोगडाकेदार गाउँपालिका–७ चडेपानीकी १७ वर्षीया भागरथीको हत्यारालाई पक्राउ गरी कारबाहीको दायरामा ल्याउन देशभरबाट दबाब बढेको थियो भने घटनाको अनुसन्धानका लागि सुदूरपश्चिम प्रहरी प्रमुख उत्तम सुवेदीलगायतका उच्च अधिकारी नै फिल्डमा खटिएका थिए ।