नेकपा एमालेका नेता डा. भीम रावलले नेपाली जनताले केपी शर्मा ओलीलाई स्पष्टीकरण सोध्नुपर्ने बेला आएको बताएका छन् ।

नेता माधवकुमार नेपाल समूह सम्वद्ध विद्यार्थीको राष्ट्रिय भेलालाई सम्बोधन गर्दै नेता रावलले अध्यक्ष ओलीले स्पष्टीकरण सोध्नु लाजमर्दो भएको बताए ।

उनले स्पष्टीकरण आफूहरूले नभई पार्टी अध्यक्ष ओलीले दिनुपर्ने बताए । प्रतिनिधिसभा विघटन गर्ने, एमसीसी जस्ता बितण्डाहरू अगाडि ल्याउने, नागरिकता विधेयकलाई प्रतिनिधि सभामा पारित हुन नदिने जस्ता काम गर्ने अध्यक्ष ओलीलाई नेपाली जनताले स्पष्टीकरण सोध्नुपर्ने बताए । 

‘नेपाली जनताले केपी शर्मा ओलीलाई तपाईंले प्रतिनिधिसभा विघटन किन गर्नुभयो ? आफ्नो विधान मिचेर मनपरी किन गर्नुभयो ? तपाईले पहिल्यै असमान सन्धि सम्झौताहरू र एमसीसी जस्ता अनेकौं बितण्डाहरू अगाडि किन सार्नुभयो ? तपाईंले नागरिकता विधेयकलाई प्रतिनिधि सभाबाट किन पारित गर्न दिनुभएन ? तपाईले नेपालको स्वतन्त्र परराष्ट्र नीति विपरितका काम किन गर्नुभयो ? जनताको जनादेशलाई तपाईंले किन बिखण्डित गर्नुभयो भनेर तपाईं–हामी नेपाली जनताले केपी शर्मा ओलीलाई स्पष्टीकरण सोध्नुपर्छ, सोध्ने छन् । केपी शर्मा ओलीले जवाफ दिनुपर्छ,’ नेता रावलले भने ।

नेता रावलले नवौं महाधिवेशनको निर्णयबाट बनेको विधानलाई कुल्चिएर संशोधन गर्ने अधिकार अध्यक्ष ओलीलाई कहाँबाट आयो भन्दै प्रश्न समेत गरे । हालसम्म पार्टीमा कुनै योगदान नभएका, पार्टी सदस्य नै नभएका व्यक्तिलाई केन्द्रीय सदस्य मनोनयन गर्ने, महाधिवेशनबाट निर्वाचित पदाधिकारीलाई पदमुक्त गर्ने र राष्ट्रिय महाधिवेशन आयोजक समिति गठन गर्ने अध्यक्ष ओलीको निर्णय विधान विपरीत भएको बताए ।

‘पार्टी विधान विपरीत नवौं राष्ट्रिय महाधिवेशनको फैसला विपरीत निर्णय गर्ने व्यक्तिले हामीलाई तपाईंहरूले अनुशासन मान्नुभएन, तपाईंहरू केन्द्रीय कमिटीमा आउनुभएन अनि तपाईंलाई स्पष्टीकरण सोध्नु भन्दाखेरी अलिकति लाज मान्नुपर्ने हो । हामी केपी शर्मा ओलीको फागुन २८ गते बसेको अवैध केन्द्रीय कमिटीको कुनै पनि निर्णय हामी मान्दैनौं,’ उनले भने ।