थप ६ अन्तर प्रदेश हवाई सेवा विस्तार गर्दै बुद्ध एयर, यस्तो छ भाडा दर

करोनापछि सुस्ताएको अर्थतन्त्रलाई बुध्द एयरको उडानले थोरै भएपनि चलायमान भूमिका खेलेको छ । दैनिक १२० भन्दा बढी उडान र ६५०० भन्दा बढी यात्रुको आउजाउले स-साना होटलदेखि पर्यटकीय गाडीहरुले रोजगारी सिर्जना गरेको छ ।

बुध्द एयर संक्रमणरहित उडानका लागि प्रतिवद्ध छ । कम्पनीले शुरुकै दिनदेखि ‘कोभिडविरुद्ध सुरक्षा निर्देशिका’, जनशक्तिलाई तालिम, पिपिई प्रदान, विमा र त्यसै अनुरुपको हवाईसेवा जुन अहिले पनि पछ्याईरहेको छ । त्यसैले हुनुपर्छ, करोना अघि र पछिका यात्रु संख्यामा भारी फरक देखिएको छ । अहिले हवाई सेवा लिने यात्रु संख्या मनग्गै बढेको छ ।

हवाई यात्रालाई विलाशिता र पहुँचभएकाले मात्र प्रयोग गर्ने भनाईलाई बुध्द एयरले गलत सावित गरेको छ । अहिले बुध्द एयरमा सबै तप्काका यात्रुले हवाई सेवा लिइरहेका छन । कारण बुध्द एयरले अपनाएको सहज र सरल भाडादर नै हुनुपर्छ ।

देशमा आएको राजनीतिक परिवर्तन र विकेन्द्रीकरणलाई आत्मसात गर्दै बुध्द एयरले आफ्नो सेवा संघीय राजधानी काठमाडौंबाट मात्र नभई प्रदेश-प्रदेशलाई पनि जोडेको छ । पछिल्ला उदाहरण हुन्- पोखराबाट भैरहवा, चितवन उडान र विराटनगरबाट तुम्लिङटार । यसैको अर्को कडी हो गण्डकी प्रदेशको राजधानी पोखराबाट विभिन्न प्रदेशहरुलाई जोड्नु । यी उडानहरुलाई बुध्द एयरले परीक्षणको रुपमा लिएको जनाएको छ ।

उडान मिति : १ मे, २०२१
पोखराबाट - सिमरा, प्रदेश २ 
पोखराबाट - विराटनगर, कोशी प्रदेश 
पोखराबाट - नेपालगञ्ज, लुम्बिनी प्रदेश 
भरतपुरबाट - भैरहवा, लुम्बिनी प्रदेश 

कम्पनीले सार्वजनिक गरेको भाडादर अनुसार पोखरा–नेपालगञ्जका लागि न्यूनतम ४ हजार ५ सय, पोखरा–विराटनगरका लागि ६ हजार, पोखरा–सिमराका लागि ४ हजार ३ सय, तुम्लिङटार–विराटनगरका लागि २ हजार ५ सय, पोखरा–भैरहवाका लागि ३ हजार १ सय र भैरहवा–भद्रपुरका लागि २ हजार ५ सय रुपैयाँ तोकिएको छ ।

भाडादर एटीआर-७२ को सञ्चालन खर्चमा आधारित छ ।

यद्यपि शुरुवाती उडानहरु यही भाडादरबाट बुध्द एयरले सानो जहाज ‘बीचक्राफ्ट’ बाट भर्नेछन् ।

यात्रुको माग प्रतिक्रियालाई मध्यनजर गरि आगामी दिनका उडानहरुलाई दैनिक बनाउने छ र ठूला जहाज एटीआरबाट उडान भर्नेछ । अन्तरप्रदेशीय उडानलाई प्रदेश सरकार र संघीय सरकारले पनि विशेष सहुलियत दिनुपर्ने बुध्द एयरले विज्ञप्तिमा जनाएको छ।