सरकारले कोरोना संक्रमणको त्रास फैलिएको तथा बिजनेस नपाएर संसद प्रभावकारी बन्न नसकेपछि प्रतिनिधि सभाको हिउँदे अधिवेशन अन्त्य भएको बताएको छ ।

सोमवार बसेको मन्त्रिपरिषद् बैठकका निर्णय सार्वजनिक गर्न आयोजित पत्रकार सम्मेलनमा सरकारका प्रवक्ता सञ्चार तथा सूचना प्रविधि मन्त्री पार्वत गुरुङले अविश्वासको प्रस्ताव छल्नका लागि अधिवेशन अन्त्य नभएको बताएका हुन् । 

‘सरकारविरुद्धको अविश्वासको प्रस्ताव छल्नका लागि संसदको अधिवेशन अन्त्य भएको होइन, निरन्तर बिजनेस नभएको तथा भीडभाड नहोस् भनेर पनि हो । अविश्वासको प्रस्ताव आउँछ भनेर भागेको होइन् त्यसरी नबुझ्नु होला’ मन्त्री गुरुङले भने । 

मन्त्रिपरिषद् बैठकको सिफारिसका आधारमा राष्ट्रपति विद्या भण्डारीले संसदको हिउँदे अधिवेशन सोमबार दिउसो १ बजेदेखि अन्त्य गरेकी थिइन् ।