नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीमाथि राष्ट्रियताको मुद्दालाई सौदावाजीको विषय बनाएको आरोप लगाएका छन् ।

कम्युनिस्ट आन्दोलनलाई क्षतविच्छत बनाउने उदेश्य साथ विसर्जन वादी आक्रमण गरेको पनि प्रचण्डले आरोपित गरेका छन् । 

प्रधानमन्त्री ओलीलाई दिएको समर्थन फिर्ता लिन संघीय संसद सचिवालयमा दर्ता गराएको पत्रमा प्रचण्डले ओलीमाथि देशलाई बाह्य शक्तिको क्रिडास्थल बनाएको गम्भीर आरोप लगाएका हुन् । 

‘ओली नेतृत्वको वर्तमान सरकारले कोरोनाको दोस्रो लहरसँग जुध्ने सन्दर्भमा नालायकी एवं अक्षमता प्रदर्शन गरेको र राष्ट्रियताको मुद्दालाई सौदावाजीको विषय बनाइ देशलाई बाह्य शक्तिको क्रिडास्थल बनाउँदै लगिरहेको तथा लोकतान्त्रिक एवं संसदीय मान्यता विपरित अध्यादेशबाट शासन चलाउने निरंकुश अभ्यासतर्फ उद्दत् हुँदै गइरहेको छ,’ प्रचण्डले पत्रमा भनेका छन् । 

माओवादी संसदीय दलका प्रमुख सचेतक देव गुरुङसहितका नेताहरुले बुधवार संसद सचिवालयमा सरकारलाई दिएको समर्थन फिर्ताको निवेदन दर्ता गराएका हुन् । 

मंगलवार बसेको माओवादी स्थायी कमिटी बैठकले सरकारलाई दिएको समर्थन फिर्ता गर्ने निर्णय गरेको थियो ।