प्रधानमन्त्री केपी शर्मा ओलीले निर्माण पूरा नभई धरहरा उद्घाटन गरेको भन्ने विपक्षी सांसदको आरोपको खण्डन गरेका छन् ।

निर्माण सम्पन्न भएरै आफू धरहराको टुम्पोमा गएर उद्घाटन गरेको उनले बताए ।

प्रतिनिधि सभामा विश्वासको मतमाथिको छलफलमा उठेका प्रश्नको जवाफ दिँदै प्रधानमन्त्री ओलीले एकपटक धरहरामा गएर हेर्न सांसदलाई सुझाव दिए ।

‘पूरा नभएको धरहरा उद्घाटन भयो भन्नुभयो, नबनेको भए म कसरी टुप्पोमा पुगे हुला ? कार पार्किङ र गार्डेन बन्ने काम सम्पन्न हुँदैछ,’ ओलीले भने, ‘मैले एकजना नेतालाई सबैतिरबाट देखिने, यहाँबाट पनि छर्लङ्ग देखिने रहेछ भनेर भनेको थिएँ । मलाई धरहरा देखायो भनेर भाषण गर्नुभएछ ।’

वैशाख १० गते मेरियट होटलबाट ओलीले माधव नेपाललाई धरहरा देखाएका थिए । भोलिपल्ट जनकपुर पुगेर नेपालले ओलीको अहंकार धरहराको टुप्पोभन्दा उचो भएको आरोप लगाएका थिए । 

सोमवार संसदमा जसपाका नेता उपेन्द्र यादवले निर्माण सम्पन्न नभएको आयोजना उद्घाटन गरेको आरोप लगाएका थिए ।