नेकपा एमालेको माधव नेपाल पक्षले आफ्नो पक्षका नेताहरूमाथि कार्वाही गरेर अध्यक्ष केपी शर्मा ओलीले पार्टी फुटाउन हतार गरेको प्रतिक्रिया जनाएको छ । प्रधानमन्त्री निवास बालुवाटारमा सोमवार बसेको एमाले स्थायी कमिटी बैठकले नेता नेपाल, झलनाथ खनालसहित ११ नेतामाथि साधारण सदस्य नरहने गरी कार्वाही गरेको थियो । 

माधव नेपाल पक्षका स्थायी कमिटी सदस्य युवराज ज्ञवालीले स्पष्टीकरण र कारवाहीको कुनै अर्थ नभएकोले आफूहरुले दुख मनाउ नगर्ने बताए । ‘अध्यक्ष ओलीले जसरी पनि एमाले फुटाउने कसम खानु भएको छ, त्यसैको उपज हो नेताहरुमाथिको कारबाही’ ज्ञवालीले लोकान्तरसँग भने । 

एमालेका पूर्वउपाध्यक्ष ज्ञवालीले आफूहरु अब केपी ओलीसँग संगै हिँड्न नसक्ने अवस्थामा पुगेको बताए । ‘एमालेलाई जेठ २ को अवस्थामा फर्काउन उहाँ सहमत हुनुभएन, विवाद समाधान गर्न भनेर गठन गरिएको कार्यदल केबल रामबहादुर थापालाई चुनाव जिताउने रणनीति रहेछ भन्ने आज आएर पुष्टि भयो’ ज्ञवालीले भने । 

सोमवार कारवाहीमा परेका नेता रावलले पनि आफूहरुमाथि गरिएको कार्वाही हास्यास्पद रहेको टिप्पणी गरेका छन् । 

‘पार्टी विधान मिच्दै मनपरी गर्ने, संविधान उल्लङ्घन गर्ने,देशको अस्मिता र अस्तित्वमा आघात पार्ने नागरिकता वितरण लगायतका राष्ट्रघाती कुकृत्य गर्ने र देशलाई अस्तव्यस्त बनाउने केपी गुटले हामीलाई पार्टी सदस्यबाट निष्कासित गरियो भन्नु हास्यास्पद छ। यो केपी गुटको फुटवाद कै निरन्तरता हो’ रावलले ट्वीटरमा लेखेका छन् ।