रूपन्देहीको बुटवल उपमहानगरपालिका वडा नम्बर १० को एक परिवारमा कोरोनाले ठूलो बज्रपात निम्त्याएको छ । 

बुटवल–१० कालिकानगरको उक्त परिवारमा ८ दिनको अन्तरमा तीन जनाको मृत्यु भएको छ । मृत्यु हुनेमा ६९ वर्षिय नरबहादुर गुरूङ, उनकी श्रीमती ५९ वर्षीया मनसरा र ३९ वर्षका छोरा प्रेमबहादुर गुरुङ रहेका छन् । 

नरबहादुर र प्रेमको उपचारका क्रममा भैरहवास्थित युनिर्भसल कलेज अफ मेडिकल साइन्स भैरहवाको मृत्यु भएको हो ।

‘होम आइसोलेसनमा बसेकी मनसराको जेठ ५ गते मृत्यु भयो,’ वडाध्यक्ष तथा छिमेकी पदमबहादुर थापाले लोकान्तरसँग भने, ‘छोरा प्रेमको जेठ ७ गते र नरबहादुरको हिजो (१२) गते निधन यो । अहिले बुटवल १० शोकमा डुबेको छ ।’

थापाले थपे, ‘प्रेमकी श्रीमतीलाई पनि कोरोना संक्रमण भएर बुटवल एन्फा टेक्निकल सेन्टरको आइसोलसनमा राखिएको छ । परिवारमा परेको त्यो बज्रपात उनलाई अहिलेसम्म सुनाइएको छैन । कसरी सुनाउने होला अन्योलमा छौं । तर, नभनी सुख छैन ।’

 समयमा उपचार गरिए पनि बचाउन नसकिएको थापाले बताए । 

‘ठूलो जोडबल गरेर आईसीयूमा भर्ना गरिएको हो । समयमै अस्पताल पनि पुर्‍याइएको हो । तर, बचाउन सकिएन । विपन्न परिवारलाई नै कोरोनाले चुडेर लग्यो,’ थापाले भने ।  

प्रेमले बुटवल एक दालमोठ उद्योगको गाडी चलाउँथे । परिवारमा जेठ ३ गते कोरोना संक्रमण देखिएको थियो । बुटवलमा अहिले कोरोना संक्रमण तीव्ररूपमा फैलिएको छ ।

बुटवलमा पछिल्लो तीन दिनयता संक्रमण केही घटे पनि एक साता अगाडिसम्म दैनिक चार सयभन्दा बढी संक्रमण थपिने गरेका थिए । अहिले संक्रमण संक्रमण दुईसय भन्दा माथि छ ।