राष्ट्रपति विद्यादेवी भण्डारीलाई होच्चाउने गरि नेकपा माओवादी केन्द्रका अध्यक्ष पुष्पकमल दाहाल 'प्रचण्ड'ले दिएको अभिव्यक्तिप्रति प्रधानमन्त्री केपी शर्मा ओलीले आक्रोश व्यक्त गरेका छन् ।

भुतपूर्वको लस्करले राष्ट्रपतिविरुद्ध मुख छाड्ने प्रतिष्पर्धा गरेको ओलीले आरोप लगाए । 

परराष्ट्र मामिला प्रतिष्ठानले शुक्रवार बालुवाटारमा आयोजना गरेको कार्यक्रममा प्रधानमन्त्री ओलीले प्रचण्डको अभिव्यक्तिप्रति आपत्ति जनाएका हुन् ।

पाँच दलका नेताले बिहीवार सम्पादकहरूसँग आयोजना गरेको कार्यक्रममा प्रचण्डले राजासँग तुलना गर्दै अहिलेका राष्ट्रपतिको सान र मान केही नभएको खालको टिप्पणी गरेका थिए । 

‘मैले एकपटक भनेको थिए, रिसाएको बिरालोले खावो चिथोर्छ, अहिले राष्ट्रपतिलाई मुख छाड्ने प्रतिष्पर्धा चलिरहेको छ । हिजो भूतपूर्वको लस्करले राष्ट्रपति भन्दा राजा राम्रो भन्नेमा पुग्नुभयो’ ओलीले भने, ‘कतिखेर के बोल्ने भन्ने पनि छैन, गणतन्त्र प्रतिको वैरभाव होला भित्री रुपमा । उहाँहरु मर्यादित समाज होइन असभ्य समाज बनाउन चाहनु हुन्छ । उहाँहरुको बोलाइ चलाइले त्यही देखाउँछ ।’  

ओलीले सरकार बचाउनको लागि आफूले कसैसँग अनुचित सम्झौता नगरेको स्पष्ट गरे ।