प्रदेश २ को प्रदेश सभा बैठक पुनः स्थगित भएको छ । प्रदेश सभामा प्रस्तुत बजेटमाथिको छलफलका लागि आज १ बजे बैठक आह्वान गरिएको थियो । 

बैठक स्थगितसम्बन्धी प्रदेश सांसदलाई सन्देश पठाएर बैठक स्थगित भएको जानकारी गराइएको छ । योसहित दोस्रो पटक सूचना टाँसेर बैठक स्थगित गरिएको हो । 

यसअघि असार १५ गते बोलाइएको बैठक एक दिन अगाडि नै स्थगित भएको जानकारी गराउँदै असार २३ गतेका लागि समय निर्धारण गरिएको थियो ।

प्रदेश सभा सचिवालयका सचिव रञ्जित यादवले आज १ बजे बस्ने भनिएको प्रदेश सभा बैठक असार २५ गते दिउँसो १ बजेसम्मका लागि स्थगित भएको जानकारी दिए । उनले प्रदेश सरकारको विकास निर्माण र अन्य खर्चको भुक्तानी असार २४ गतेसम्म मात्रै हुने भएकाले आज बस्ने बैठक स्थगित गरी २५ गते बोलाइएको बताए । 

उनले प्रदेश सांसदहरूको संसदीय विकास कोषको रकम भुक्तानी र सरकारको अन्य खर्च भुक्तानी गर्न असार २४ गतेसम्म मात्रै हुने भएकाले समय व्यस्तताका कारण संसद् सचिवालयमा सूचना टाँसेर प्रदेश सभा बैठक स्थगित गरिएको जनाए । 

असार १ गते अर्थमन्त्री विजय यादवले प्रदेश सभामा पेश गरेको प्रदेश सरकारको बजेटमाथि छलफल शुरू हुन सकेको छैन । प्रदेश सभा सचिवालयले बैठक बोलाए पनि सरकारले तयारी नपुगेको जानकारी गराएपछि संसद् सचिवालयले बैठक पटक-पटक स्थगित गर्दै आएको छ ।