नेकपा एमालेभित्र देखिएको विवाद समाधानका लागि गठित कार्यदल सहमतिउन्मुख भएको छ ।

कार्यदलमा भएको औपचारिक तथा नेताहरू बीचका अनौपचारिक संवादले सहमतिको नजिक पुगेको नेताहरूले बताएका छन् । 

प्रधानमन्त्री एवं पार्टी अध्यक्ष केपी शर्मा ओली र वरिष्ठ नेता माधव नेपालबीचको औपचारिक संवादपछि बिहीवार बसेको कार्यदलको बैठक सहमति नजिक पुगेको हो । 

आजै साझ पुनः बैठक बसेर मिल्न बाँकी विषयमा सहमति खोजिने कार्यदलका सदस्यहरूले बताए । 

‘अध्यक्ष ओली र नेपालबीच भएको संवादपछि आजको कार्यदल बैठकमा धेरै विषयमा सहमति नजिक पुगिएको छ । कतिपय विषयमा हिजोभन्दा थप प्रगति भएको छ,’ बैठकपछि कार्यदलका सदस्य एवं एमाले सचिव गोकर्ण विष्टले भने, ‘बाँकी कुरा पनि लगभग समाधानको बिन्दुमा आएका छन् । अब हामीलाई धेरै समय लाग्ने अवस्था छैन ।’

कार्यदलको बैठकअघि संयोजक भीम रावल र अर्थमन्त्री विष्णु पौडेलबीच कुराकानी भएको थियो । पौडेलसँग भेटेपछि रावलले माधव नेपालसँग परामर्श गरेका थिए । 

कार्यदलका सदस्यले आफ्ना पक्षका नेताहरूसँग छलफल गरेर साँझ पुनः बैठक बस्ने सहमति भएको संस्थापन पक्षका एक नेताले जानकारी दिए । ‘साँझसम्म केही सकारात्मक सन्देश दिनेगरी कुराकानी भइरहेको छ,’ ती नेताले लोकान्तरसँग भने । 

लामो समय निष्क्रिय रहेको कार्यदल सोमवारदेखि सक्रिय बनेसँगै एमाले विवाद सहमतितर्फ उन्मुख भएको छ । 

सर्वोच्च अदालतको आदेशले फागुन २३ गते नेकपा एमाले ब्युँतिएपछि फागुन २८ बाट एमालेमा विवाद शुरू भएको थियो । 

कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेपछि एमाले विवाद उत्कर्षमा पुगेको छ ।