नेकपा एमालेको माधव नेपाल समूहले पार्टीले सोधेको स्पष्टीकरण दिने तयारी गरेको छ ।

केन्द्रीय कमिटी बैठकको निर्णयका आधारमा एमाले अध्यक्ष केपी शर्मा ओलीले बुधवार माधव नेपालसहित २२ जना सांसदलाई २४ घण्टे स्पष्टीकरण सोधेका थिए । 

बिहीवारै स्पष्टीकरण बुझाउने गरी तयारी भएको स्रोतले बतायो । प्रधानमन्त्री शेरबहादुर देउवालाई विश्वासको मत दिएका नेपालसहित २२ जना सदस्यलाई स्पष्टीकरण सोधिएको थियो ।

स्पष्टीकरण पत्रमा विश्वासको मतको प्रसङ्ग उल्लेख नगरी पार्टी निर्णय र निर्देशन किन पालना नगरेको भनेर प्रश्न गरिएको छ । 

देउवाको पक्षमा विश्वासको मत दिएका एमाले सांसद गोपाल बमले स्पष्टीकरण बुझाउन लागिएको लोकान्तरलाई जानकारी दिए ।

‘हामीले संविधान र संसद बचाउन देउवालाई भोट दिएको हो तर जसरी हामीहरूलाई आपराधिक क्रियाकलाप गरेको भनेर आरोप लगाइएको छ, त्यसमा हाम्रो आपत्ति छ,’ बमले लोकान्तरसँग भने । 

स्पष्टीकरणको जवाफबारे केही नबताए पनि झुकेर जवाफ नदिइने सांसद बमले बताए । एमाले केन्द्रीय कमिटीको बिहीवार बस्ने बैठकले स्पष्टीकरण सम्बन्धमा निर्णय गर्दैछ । 

तुलसीलाल स्मृति प्रतिष्ठानको कार्यालय च्यासल ललितपुरमा दिउँसो बस्ने बैठकले स्पष्टीकरण सम्बन्धमा निर्णय लिने संस्थापन पक्षका एक स्थायी कमिटी सदस्यले लोकान्तरलाई जानकारी दिए ।