अफगानिस्तानबाट अमेरिकी सैनिकहरू हटेसँगै तालिबानले मुलुक कब्जा गर्न भरमग्दूर प्रयास गरिरहेको छ । अफगान सेनाले तालिबानको यो कोशिश रोक्न खोजिरहेको छ । 

विगत केही दिनमा तालिबानका ३०० लडाकूलाई आफूहरूले मारेको अफगान सेनाको दाबी छ । 

अफगानिस्तान राष्ट्रिय रक्षा तथा सुरक्षा बलका जवानहरूले तालिबानलाई रोक्नका लागि पूरा कोशिश गरिरहेका छन् । गजनी, कन्दहार, कुन्दुज लगायतका स्थानमा तालिबान लडाकूहरूलाई मारेको अफगान सेना बताउँछ । 

सेनाले १३ वटा आईयएडी बम पनि बरामद गरिएको जनाएको छ । 

अफगानिस्तानको परराष्ट्र मन्त्रालयका अनुसार, तालिबानले १८३ वटा जिल्ला केन्द्र र १९ वटा सीमावर्ती जिल्लाहरू कब्जामा लिएको छ । क्रसिङ पोइन्टहरू समेत तालिबानको कब्जामा रहेकाले मानिसको आवागमन र सामान ओसारपसारमा कठिनाइ आइरहेको छ । 

अप्रिल १४ देखि शुरू भएको तालिबानसँगको लडाइँमा अफगान सुरक्षाबलका लगभग चार हजार जवान शहीद भइसकेका छन् । सात हजारजना जति घाइते छन् । १६ सयजना जतिलाई तालिबानले बन्दी बनाएको छ । 

तालिबानले यसबीचमा लगभग दुई हजारजना सर्वसाधारणको ज्यान लिएको छ भने त्यही हाराहारीमा मानिसहरू घाइते छन् ।