अफगानिस्तानको पहिलो महिला गभर्नर सलीमा मजारीलाई तालिबान लडाकूहरूले नियन्त्रणमा लिएको बताइएको छ । 

देशको बाल्ख प्रान्तमा तालिबानको सशक्त प्रतिकार गरिरहेकी मजारी कुन स्थितिमा छिन् भन्ने बारेमा कुनै खबर आएको छैन । 

तालिबानले मजारीलाई चारकिन्ट जिल्लामा नियन्त्रणमा लिएको बताइएको छ । अफगानिस्तानमा तालिबानले एकपछि अर्को गरी विजय पाउँदा अरूले सजिलै आत्मसमर्पण गरेको भए पनि मजारीले हार नमानी लडिरहेको बताइएको छ । 

पितृसत्तात्मक अफगानिस्तानमा महिला जिल्ला गभर्नरका रूपमा सलीमा मजारी मिसनमा थिइन् । उनी तालिबानविरुद्ध लड्नका लागि पुरुषहरूलाई भर्ती गरिरहेकी थिइन् । 

मे महिनादेखि नै तालिबानले अफगानिस्तानको ग्रामीण क्षेत्रमा सक्रियता बढाइरहेका थिए । अमेरिकाका राष्ट्रपति जो बाइडनले आफ्ना सैसनक फिर्ता गर्ने घोषणा गरे अनि हेर्दाहेर्दै अफगानिस्तानको तस्वीर परिवर्तन भयो । तालिबानको कब्जामा देश आएपछि मानिसहरूको जिन्दगी बदलिसकेको छ । 

दुर्गम क्षेत्रमा रहेको जिल्ला चारकिन्टमा मजारीको शासन थियो । बल्ख प्रान्तको यो जिल्ला मजार-ए-शरीफभन्दा दक्षिणतर्फ एक घन्टा टाढा पर्छ । 

मजारी हजारा समुदायकी सदस्य हुन् र उनीहरू अधिकांश शिया छन् ।