प्रधानमन्त्री शेरबहादुर देउवाले कुम्भेश्वर (सर्वेश्वर) मन्दिरको उद्घाटन गरेका छन् ।

विसं २०७२ सालको शक्तिशाली भुकम्पले क्षतिग्रस्त मन्दिर परिसरमा कुम्भेश्वर महादेव र मन्दिरको गजुरको पूजा गरी मन्दिरको उद्घाटन गरेका हुन् ।

 पाँच तले सो मन्दिरको कुम्भेश्वर महादेवका पुजारी माधव श्याम शर्माले मन्त्रोच्चारण गरेका थिए ।

 बिहान ११ बजेको शुभ साइतमा प्रधानमन्त्री र  पत्नी आरजु देउवा राणाले पूजा अर्चना गरेका थिए ।

बैशाख १२ र २९ गते आएको भुकम्पले मन्दिरको तीन तला क्षतिग्रस्त भएको थियो । यसअघि नेपाली कांग्रेसका सभापतिको हैसियतमा विसं २०७४ साल बैशाख ३० गते प्रम देउवाले नै मन्दिरको क्षमा पूजा गरेका थिए । 

क्षमापूजा गरी जीर्णोद्धार शुरु गरेको ४ वर्षपछि मन्दिरको पुनःनिर्माण सम्पन्न भएको हो । मन्दिर जीर्णोद्धार समितिका संयोजक एवं कुम्भेश्वर टोल सुधार समितिका संयोजक अरोजकुमार खड्गीले करिब २ करोड ८२ लाख रुपिया लागतमा जीर्णोद्धार सम्पन्न भएको जानकारी दिए ।

उनले लकडाउन र  निर्माण सामग्रीको अभावको कारण जीर्णोद्धारमा ढिलाई भएको बताए ।

समितिको निरन्तर सहयोगको कारण ठेकेदार कम्पनीले समयमै काम सम्पन्न गरेको संयोजक खड्गीको भनाई छ ।

पुरातत्व विभागले  धर्मएस तुल्सी ड्रामा जेभि ललितपुरलाई  ठेक्का दिएको थियो  । मन्दिर जीर्णोद्धार समितिको संयोजकहरूमा टोल सुधार समितिका अरोजकुमार  अध्यक्ष खड्गी, कुम्भेश्वर मन्दिरका पुजारी माधव श्याम शर्मा र बंगलामुखी मन्दिरका द्योपाला पुष्प कपाली रहेका थिए । 

  उद्घाटन समारोह अवधिभर कार्यक्रममा मन्दिरका भजन मण्डलले  परम्परागत बाजा बजाएका  थिए ।  

मन्दिर उद्घाटन लगत्तै प्रधानमन्त्री देउवा र उनकी पत्नी आरजु देउवाले लगायत कुम्भेश्वर मन्दिर  परिसरमा रहेको बंगलामुखी, लगायत  मठ मन्दिरको दर्शन गरेका थिए । पूजा पछि प्रम देउवाले निर्माण समितिले तयार गरेको शिलापत्र अनावरण गरेका थिए ।