राष्ट्र बैंकले दियो प्रोभिजनिङमा छुट, अब कोभिडबाट प्रभावित २५ लाखसम्मको ऋणमा प्रोभिजनिङ नगरे पनि हुने

नेपाल राष्ट्र बैंकले ऋणको नोक्सानी ब्यवस्थापन (प्रोभिजनिङ) मा छुट दिएको छ।

मंगलवार एक निर्देशन जारी गर्दै राष्ट्र बैंकले २५ लाख रुपैयाँसम्मको ऋणमा प्रोभिजनिङ गर्न नपर्ने ब्यवस्था गरेको छ।

राष्ट्र बैंकले दिएको नयाँ सुविधा अनुसार अब  प्राविधिक तथा व्यवसायिक तालिम प्रदान गर्ने संस्थाहरुले लगेको ऋण बिग्रिएमा प्रोभिजनिङ नगरे पनि हुन्छ। यसअघि यसको सीमा १५ लाख रुपैयाँ थियो।

कोभिड-१९ बाट प्रभावित विभिन्न पेशामा संलग्न ब्यवसायीलाई प्रदान गर्ने कर्जामा पनि प्रोभिजनिङ नगरे हुन्छ।

सार्वजनिक यातायात ब्यवसायीलाई सवारी साधन सञ्चालन तथा मर्मतकालागि प्रति साधन २ लाख रुपैयाँ ऋणको ब्यवस्था गरिएको छ। यस्तो कर्जामा डेब्ट इक्विटी रेसियो र एकल ग्राहक कर्जा सीमा २०७९ असारसम्म कायम नगरे पनि हुन्छ।

सहवित्तीयकरण ऋणको लागत घटाइएको छ। एक अर्बदेखि माथिका ऋण दुईभन्दा बढि संस्था मिलेर दिनु पर्ने व्यवस्थालाई हटाएर २ अर्ब निर्धारण गरिएको छ। यसले लागत घट्छ भने छरितो पनि हुन्छ।