प्रमुख प्रतिपक्षी दल नेकपा एमालेले दल विभाजनमा सभामुख अग्नि सापकोटाको भूमिका रहेको आरोप लगाउँदै राष्ट्रिय सभाको बैठक अवरुद्ध गरेको छ । 

सोमवार बसेको राष्ट्रिय सभा बैठकमा अध्यक्षसँग समय लिएर एमाले सांसद भैरवसुन्दर श्रेष्ठले एमाले विभाजनमा सभामुख सापकोटाको भूमिका रहेकोले विरोध गर्नुपरेको बताए । 

उनले विगतमा परम्पराविपरीत पार्टीले गरेको कारवाही अनुमोदन नगरेका कारण एमालेलाई फुटाउन सभामुखको भूमिका रहेको उनले दाबी गरे । एमाले सांसदले उठेर विरोध जनाए पनि राष्ट्रिय सभामा विधायक व्यवस्थापन समितिको प्रतिवेदन पेश गरिएको छ ।

एमाले सांसदको विरोधप्रति लक्षित गर्दै राष्ट्रिय सभाका अध्यक्ष गणेश तिमल्सिनाले प्रतिनिधि सभाको विषयलाई लिएर राष्ट्रिय सभा अवरुद्ध नगर्न आग्रह गरे । 

‘तपाईंहरूले उठाउनु भएको विषयमा सिंगो राष्ट्रको ध्यान गएको छ । त्यो विषय प्रतिनिधि सभाको विषय भएको हुनाले त्यहीबाट हल हुने भएकोले राष्ट्रिय सभा सञ्चालनका लागि आग्रह गर्दछु,’ तिमल्सिनाले भने । 

लोक सेवा आयोगसम्बन्धी विधायन व्यवस्थापन समितिको प्रतिवेदन पेश गरेर बैठक १५ मिनेटका लागि स्थगित भएको छ ।