काभ्रेका अर्जुन लामाको हत्या अभियोगमा प्रतिवादी बनाइएका सभामुख अग्निप्रसाद सापकोटाविरुद्धको मुद्दा संवैधानिक इजलासमा पेशी चढे पनि सुनुवाइ हुन सकेन ।

प्रधानन्यायाधीश चोलेन्द्र शम्शेर जबराको नेतृत्वमा न्यायाधीशहरू दीपककुमार कार्की, मीरा खड्का, हरिकृष्ण कार्की र ईश्वरप्रसाद खतिवडासहित ५ जनाको इजलासमा उक्त मुद्दाको पेशी तोकिए पनि हेर्न नमिल्नेमा परेको हो ।

कानून व्यवसायी छँदा सो मुद्दामा बहस गरेका कारण न्यायाधीश कार्कीले मुद्दा हेर्न नमिल्ने भएकाले सुनुवाइ स्थगित भएको सर्वोच्च अदालत स्रोतले जनाएको छ ।

२०६२ वैशाख १६ गते तत्कालीन विद्रोही माओवादीका कार्यकर्ताले अर्जुन लामाको अपहरण गरी हत्या गरेका थिए ।

उक्त घटनामा हालका सभामुख सापकोटासहित पूर्व सहायक ऊर्जा मन्त्री सूर्यमान दोङ लगायतको प्रत्यक्ष संलग्नता रहेको भन्दै मृतक लामाकी श्रीमती पूर्णीमायाले सर्वोच्च अदालतमा रिट दायर गरेकी थिइन् ।