राष्ट्रिय सभामा १९ सदस्यको पद फागुन २१ गतेबाट रिक्त हुँदैछ । 

यस विषयमा छलफलका लागि प्रधानमन्त्री शेरबहादुर देउवासँग प्रमुख निर्वाचन आयुक्त दिनेशकुमार थपलियासहित अन्य निर्वाचन आयुक्तहरूले भेट गरेका थिए । 

भेटमा स्थानीय तहको आगामी निर्वाचनका सम्बन्धमा भएका कानूनी व्यवस्था, प्रतिनिधि सभाका रिक्त ४ सदस्य र प्रदेश सभामा रिक्त १८ सदस्य पदको उपनिर्वाचनका विषयमा पनि छलफल भएको थियो । 

भेटमा प्रधानमन्त्री देउवाले राष्ट्रिय सभा सदस्य पदको निर्वाचनको मिति चाँडै तोकिने, स्थानीय तहको आगामी निर्वाचन तथा प्रतिनिधि सभा र प्रदेश सभामा रिक्त सदस्य पदको उपनिर्वाचनका विषयमा सत्ता साझेदार दलहरू एवम् अन्य राजनीतिक दलहरूसँग छलफल गरी निष्कर्षमा पुग्ने बताएका थिए । 

देउवाले निर्वाचन प्रणालीमा सुधार र मतदाता नामावली दर्ता कार्यलाई प्रभावकारी बनाउन सरकारले सहयोग गर्ने स्पष्ट गर्दै एकीकृत निर्वाचन कानूनसम्बन्धी प्रक्रिया अगाडि बढाउने बताए ।