गत असोज ३१ गतेदेखि परेको अविरल वर्षाका कारण गण्डकी प्रदेशमा ३ हजारभन्दा बढी मेट्रिक टन धानबालीमा क्षति पुर्‍याएको छ ।

गण्डकी प्रदेशमा १ लाख १७ हजार १३१ हेक्टर क्षेत्रफलमा धानबाली लगाइएकामा बेमौसमी वर्षाका कारण अनुमानित ३ हजार ३५ मेट्रिक टन धानबालीमा क्षति पुगेको कृषि विकास निर्देशनालय पोखराका कृषि अर्थविज्ञ शशी अधिकारीले जानकारी दिइन् ।

कृषि अर्थविज्ञ अधिकारीका अनुसार जिल्ला–जिल्लामा रहेका कृषि ज्ञान केन्द्रहरू र पालिकाहरूबाट संकलन गरिएको विवरणअनुसार गण्डकी प्रदेशमा २ हजार ३७८ हेक्टर क्षेत्रफलको धान भित्र्याइसकिएको छ ।

झरी वर्षा र हावाहुरीका कारण ८४३ हेक्टर क्षेत्रफलमा पूर्ण नोक्सानी भएको छ भने ७ हजार ११२ हेक्टर क्षेत्रफलमा आंशिक क्षति भएको कृषि अर्थविज्ञ अधिकारीले जानकारी दिइन् ।

गण्डकी प्रदेश अन्तर्गतका जिल्लाहरूमा अनुमानित ३ हजार ३५ मेट्रिक टन धानबालीमा क्षति पुग्दा अनुमानित ८७ लाख ५५ हजार ३९८ मूल्य बराबरको क्षति भएको अनुमान रहेको उनले बताइन् ।

जिल्लाजिल्लामा रहेका कृषि ज्ञान केन्द्र र पालिकासँग तथ्यांक संकलन कार्य जारी रहेकाले केही दिनमा वास्तविक क्षतिको विवरण आउने कृषि विकास निर्देशनालय पोखराले जनाएको छ ।

बेमौसमी अविरल वर्षाका कारण पर्वतमा सबैभन्दा धेरै धानबालीमा क्षति पुगेको छ । पर्वतमा ४९०, तनहुँमा ३४८ र कास्कीमा ३४३ हेक्टरमा क्षति पुगेको छ । अन्य जिल्लाहरूमा आंशिक क्षति पुगेको छ ।