आगामी वर्षको विधानसभा निर्वाचनका लागि भाजपाले बनायो यस्तो रणनीति

भारतमा हालै भएका उपचुनावहरूमा राम्रो परिणाम आएपछि भारतीय जनता पार्टीले सन् २०२२ मा पाँचवटा राज्यमा हुन लागेको विधानसभा निर्वाचनका लागि रणनीति बनाएको छ । 

उत्तर प्रदेश, उत्तराखण्ड, मणिपुर, गोवा र पञ्जाबमा विधानसभा निर्वाचन हुन लागेको छ । 

भाजपाका शीर्ष नेताहरू यस विषयमा मन्थन गरिरहेका छन् । आइतवार दिल्लीमा भएको पार्टीको राष्ट्रिय कार्यकारिणी बैठकमा पनि यस विषयमा मन्थन भयो । भाजपालाई महंगी, बेरोजगारी र कोरोनाले भाजपाको विजयरथ रोक्न सक्छ । 

कोरोनाको समयमा देखिएका समस्याबाट राहत दिएमा जनताले भाजपालाई पत्याउने नेताहरूको निष्कर्ष छ । 

एक अन्य राष्ट्रिय नेताले भारतीय सञ्चारमाध्यमलाई बताएअनुसार, भाजपाले विधानसभा निर्वाचनमा दुईवटा कुरामा जोड दिनेछ । पहिलो, केन्द्र सरकारको कामकाजको लेखाजोखा र मोदीको अनुहार । दोस्रो, भाजपाले शासन चलाएको राज्य सरकारको उपलब्धिको चर्चा । 

आफ्नो क्षेत्रमा मन्त्रीहरूले ६ महिनासम्म फोकस गर्नेछन् । सबै सांसद र विधायकलाई आआफ्नो क्षेत्रमा बढी समय दिनुपर्नेछ । सरकारले गरेको कामको फेहरिस्त जनतासमक्ष राख्ने जिम्मेवारी उनीहरूलाई दिइएको छ । 

भाजपाले युवा र महिलामा बढी फोकस गर्न खोजेको छ । युवा भोटरहरू पहिलेदेखि नै भाजपाका शक्ति हुन् । महिला सम्मान र महिला सहभागितालाई पनि भाजपाले जोड दिनेछ । 

विपक्षीहरूलाई घेर्नका लागि पनि पार्टीले ठूलै तयारी गरेको छ । विपक्षी नेताहरूको विवादास्पद बयानलाई पार्टीले चुनावको एजेन्डा बनाउनेछ ।

बूथ लेभलमा पार्टीलाई बलियो बनाउन र आफ्ना मतदातालाई बूथसम्म पुग्नका लागि भाजपाले अभियान चलाउनेछ । पार्टीले तीन करोडभन्दा बढी पन्ना प्रमुख बनाउन थालेको छ । पन्ना भन्नाले मतदाता सूची हो । एक पन्नामा ३० मतदाताको नाम हुन्छ । तिनलाई मतदान केन्द्रसम्म आउनका लागि प्रोत्साहन गर्ने जिम्मेवारी पन्ना प्रमुखको हुनेछ । 

राष्ट्रिय स्वयंसेवक संघको सुझावलाई पनि पार्टीले मनन गर्नेछ । संघले धरातलमा राम्रो पकड बनाएको छ ।