सन् १९६२ मा र पोहोर साल गलवान उपत्यकामा भारतविरुद्ध भएको युद्धमा वीरगति प्राप्त गरेका सैनिकहरूको चिहानलाई नवीकरण गरी त्यसलाई चिनियाँहरूले देशभक्तिको शिक्षाको आधार बनाएका छन् । 

सिन्च्याङमा एकान्तमा रहेको चिहानलाई चिनियाँ कम्युनिस्ट पार्टीको शिक्षा केन्द्रका रूपमा सम्मान गरिएको छ । कब्रिस्तानको नवीकरणको काम जोडतोडका साथ चलिरहेको चिनियाँ जनमुक्ति सेनाको एक पोर्टलले जानकारी दिएको छ । 

काङ्सीवार शहीद चिहानलाई देशभक्तिको केन्द्रको दर्जा दिँदै त्यसको नवीकरणलाई जोड दिनुमा गत जुलाईमा भएको एक घटना जिम्मेवार छ । त्यतिखेर चीनका एक ब्लगरले उक्त स्थानमा पसेर हाँसिरहेको सेल्फी खिच्दै अन्लाइनमा राखेपछि मानिसहरू रिसाएका थिए । 

नोभेम्बर १५ मा ती ब्लगरलाई मृत सैनिकको अपमान गरेको भन्दै सात महिनाको कैद सजाय दिइएको थियो । 

भारत र चीनबीचको सैन्य भिडन्तको इतिहासमा देशभक्तिपूर्ण शिक्षा केन्द्रका रूपमा चिहानलाई लिइएको सम्भवतः यो पहिलो अवसर हो । 

काङ्सीवार शहीद चिहान ४ हजार २८० मिटरको उचाइमा रहेको छ । सिन्च्याङ प्रान्तको काराकोरम पहाडहरू यो चिहान छ । 

चीन र भारतको विवादित सीमाबाछ लगभग १०० किलोमिटर पर रहेको यो कब्रिस्तान सन् १९६२ को युद्धमा मारिएका चिनियाँ सैनिकहरूको सम्झनाका लागि सन् १९६५ मा बनाइएको थियो । 

अहिले यस कब्रिस्तानमा १०८ जना चिनियाँ सैनिकहरूको चिहान छ । गलवान उपत्यकामा भएको भिडन्तमा मारिएका चारजना सैनिकको चिहान पनि त्यहीँ छ ।