प्रधानमन्त्री एवं नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बीच संसद्को अवरोध हटाउन सर्वदलीय बैठक बोलाउने सहमति भएको छ । 

प्रधानमन्त्री निवास बालुवाटारमा शुक्रवार बिहान भएको भेटवार्तामा संसद्को गतिरोध अन्त्यका लागि सर्वदलीय बैठक बोलाउने सहमति भएको हो ।

यसअघि संसद्को नवौं अधिवेशन चलिरहेको समयमा देउवाले बोलाएको सर्वदलीय बैठकमा एमाले उपस्थित भएको थिएन । मंसिर २८ गते शुरू भएको संसद्को हिउँदे अधिवेशनमा पनि एमालेले अवरोध शुरू गरेको छ । 

‘भेटको अवसरमा सदन सुचारू गर्ने लगायतका समसामयिक राष्ट्रिय मुद्दामा प्रमले सर्वदलीय बैठक बोलाउने विषयमा छलफल भयो,’ भेटपछि प्रचण्डपुत्री गंगा दाहालले फेसबूकमा लेखेकी छिन् । 

बालुवाटार स्रोतका अनुसार अमेरिकी आर्थिक सहयोग मिलेनियम च्यालेन्ज कम्प्याक्ट (एमसीसी) लगायतका विषयमा साझा धारणा बनाउन सत्ता गठबन्धन र सर्वदलीय बैठक बोलाउने सहमति दुई नेताबीच भएको छ । 

एमसीसी अनुमोदन गर्नका लागि अमेरिकाले डिसेम्बर मध्यसम्मको समय दिएको थियो । एमसीसी अनुमोदनबारे सत्ता गठबन्धनभित्र तीव्र मतभेद छ । 

पहिलो दिनको बैठक एमालेले अवरुद्ध गरेपछि प्रतिनिधि सभाको बैठक पुस ६ गतेसम्मको लागि स्थगित भएको छ ।

दलहरूबीच सहमति जुट्न नसक्दा एमसीसी लामो समयदेखि संसद्मा अड्किएर बसेको छ । 

एमसीसीबारे नेकपा एमाले पनि अनिर्णित छ । 

भीम रावल लगायतका कतिपय नेताले एमसीसीको विरोध गर्दै आएका छन् ।