नेपाली कांग्रेसको केन्द्रीय कार्यालय सानेपामा ३५ जना खुल्ला केन्द्रीय सदस्यहरूको लागि मतगणना जारी छ । 

शनिवार दिउँसोबाट शुरू गरिएको मतगणना आज रातिसम्ममा सक्ने निर्वाचन समितिले बताएको छ । 

मतगणनामा कुन उम्मेदवारले कति मत पाए भन्ने सार्वजनिक गरिएको छैन । १२ स्थानमा मतगणना भइरहेको बताइएको छ । हरेक १२ सय मत गणना भएपछि विवरण सार्वजनिक गर्ने भनिएको छ । 

मतगणनास्थलमा रहेका एक प्रतिनिधिका अनुसार केहीबेरअघिसम्म करीब ९०० मतगणना भएको छ । 

उक्त गणनाका आधारमा कांग्रेसका पूर्व महामन्त्री शशांक कोइराला पहिलो स्थानमा रहेका छन् । 

उनलाई गृहमन्त्री रहेका बालकृष्ण खाणले पछ्याइरहेका छन् । खाण शेरबहादुर देउवाको प्यानलबाट उम्मेदवार बनेका थिए । 

त्यसै गरी, सञ्चारमन्त्री रहेका ज्ञानेन्द्र कार्की तेस्रो स्थानमा छन् । शुरूआती अवस्थामा दोस्रो स्थानमा रहेका उदयशमशेर राणा भने अहिले शीर्ष १० स्थान भन्दा तल परेको ती प्रतिनिधिले बताए । 

त्यसबाहेक रमेश लेखक, अर्जुननरसिंह केसी, एपी साउँदलगायतका नेता मतगणनामा शीर्ष १० मा रहेको बताइएको छ ।

कांग्रेसको खुल्लातर्फ ३५ जनाको लागि ९९ जनाले प्रतिस्पर्धा गरेका थिए ।