हालै सार्वजनिक भएका अमेरिकी रक्षा मन्त्रालय पेन्टागनका दस्तावेजहरूमा अमेरिकाको ड्रोन आक्रमणमा परी हजारौं सर्वसाधारणको ज्यान गएको खुलासा द न्युयोर्क टाइम्सले शनिवार खबर दिएको छ । 

गलत सूचनाका आधारमा गरिएको उक्त आक्रमणमा परी धेरै बालबालिका समेत मारिएका छन् । 

‘तर कसैलाई पनि गलत काम गरेकोमा विभागीय कारवाही गरेको रेकर्ड छैन,’ पत्रिकाले लेख्यो । 

१२ जनाभन्दा कम पीडित तथा तिनको परिवारलाई क्षतिपूर्ति दिइएको छ । 

पत्रिकाले प्रकाशन गरेको एक घटनामा अमेरिकाका विशेष बलले उत्तरी सिरियामा इस्लामिक स्टेटका ८५ जना लडाकूलाई मारेको दाबी छ । मारिएकाहरू १२० जना गाउँलेहरू छन् । 

पत्रिकाका अनुसार, ट्यालोन एन्भिल नामक अमेरिकी आक्रमण सेलले नियमित रूपमा नागरिक सुरक्षा प्रक्रियाको उल्लंघन गर्दै बम आक्रमण गरेको थियो ।

अगस्ट महिनामा न्युयोर्क टाइम्सले गरेको अनुसन्धानमा काबुलमा रहेको एक परिवारका १० सदस्यमाथि अमेरिकाले आक्रमण गरेको पाइएको थियो । अमेरिकी अधिकारीहरूले बम राखिएको वाहन ध्वस्त पारेको दाबी गरेका थिए तर त्यसलाई पछि फिर्ता लिए । 

अमेरिकाले राष्ट्रपति बाराक ओबामाको पालादेखि हवाई आक्रमण थालेको थियो । इरान र अफगानिस्तानमा भएका स्थलयुद्धमा हजारौं अमेरिकी सैनिकहरू मारिएपछि हवाई आक्रमण थालिएको थियो । 

अमेरिकाले स्थलसैनिकहरूको संख्या घटाएर ड्रोन आक्रमणको संख्या बढाउन थालेको थियो । डोनल्ड ट्रम्पको पालामा यसलाई थप तीव्र बनाइएको थियो । 

पाँच वर्षको अवधिमा अमेरिकी बलहरूले अफगानिस्तान, इराक र सिरियामा ५० हजारभन्दा बढी आक्रमण गरेको द न्युयोर्क टाइम्सले लेखेको छ ।