नेकपा माओवादी केन्द्रका अध्यक्ष पुष्पकमल दाहाल प्रचण्डले पेश गरेको राजनीतिक प्रतिवेदनमाथि मंगलवारदेखि समूहगत छलफल चलिरहेको छ ।

महाधिवेशनस्थल प्रज्ञा भवन, पार्टी कार्यालय र काठमाडौंका विभिन्न पार्टी प्यालेसमा समूहगत छलफल चलिरहेको हो । 

प्रचण्डले सेमवार बन्दसत्रमा पेश गरेको प्रतिवेदनमाथिको छलफलमा सहभागीले पार्टीको क्रान्तिकारी रुपान्तरण जरुरी भए पनि त्यसको अगुवाइ नेतृत्वले गर्नुपर्ने बताएका छन् । विभिन्न समूहमा भइरहेको छलफलमा प्रतिनिधिहरूले नेताहरूको जीवनशैली फेरिएको, कायकर्ताभन्दा पनि बिचौलियासँग उठबस भइरहेको जस्ता टिप्पणी गरिरहेका छन् । 

गोप्य ढंगले भइरहेको छलफलमा सहभागीले पार्टी संसदीय भासमा फस्दै गएको भन्दै चिन्ता व्यक्त गरेका छन् । ‘संसदीय व्यवस्थाको विरुद्ध संघर्ष गरेका हामी कांग्रेस-एमाले जस्तै संसदीय भासमा फस्दै गएका छौं,’ प्रज्ञा प्रतिष्ठानमा चलिरहेको समूहगत छलफलमा उठेको कुराबारे एक केन्द्रीय सदस्यले भने । 

नेतृ धर्मशिला चापागाईले समूहमा रचनात्मक ढंगले छलफल चलिरहेको बताइन् । प्रचण्डको प्रस्तावमाथि राम कार्कीले फरक मत राखेका छन् । कार्कीले प्रचण्डको प्रतिवेदन पेश हुनुभन्दा अगावै आफूले प्रतिवेदन तयार गरेको बताएका थिए । 

यसैबीच अध्यक्ष प्रचण्डले पार्टीमा सुधार आफूबाटै हुने बताएका छन् । माओवादी अधिवेशनको उद्घाटनस्थल प्रज्ञा भवनबाट बाहिरिने क्रममा मंगलवार पत्रकारहरूले सोधेको एक प्रश्नको जवाफमा प्रचण्डले सुधार आफूबाटै हुने बताएका हुन् । 

‘पार्टीमा जे सुधार हुन्छ मै बाट हुन्छ र भैरहेको छ,’ प्रचण्डले भने । उनले जनतासँगको सम्बन्ध सुधारका लागि आफू फिल्डमा पनि जाने बताए । ‘फिल्डमा जान्छु र गैरहेको पनि छु,’ उनले भने ।