भारतको आन्ध्रप्रदेश : नेताले गरे सत्तामा आएपछि रक्सी सस्तोमा उपलब्ध गराउने वाचा

भारतको आन्ध्र प्रदेशमा भारतीय जनता पार्टीका प्रदेश अध्यक्ष सोमू वीरराजूले अनौठो बयान दिएका छन् । 

भाजपा सत्तामा आएमा प्रदेशमा ५० भारुमा गुणस्तरीय रक्सीको क्वार्टर बोतल उपलब्ध गराउने उनको भनाइ छ ।

अहिले त्यति मात्राको रक्सी २०० भारुमा उपलब्ध भइरहेको छ । 

मंगलवार एक जनसभालाई सम्बोधन गर्ने क्रममा वीरराजूले राज्य सरकारमाथि आक्रमण गर्दै राज्यमा नक्कली ब्रान्डको रक्सी उच्च मूल्यमा बिक्री गरिएको बताए । 

प्रदेशमा हरेक व्यक्तिले महिनाको १२ हजार भारु रक्सीमा खर्च गरिरहेको उनको भनाइ छ । एक करोड मानिसले रक्सी पिउने गरेको र त्यस एक करोडले भाजपालाई भोट दिनुपर्ने उनको भनाइ छ । 

भाजपा सरकारमा आएमा ७५ भारुमा गुणस्तरीय रक्सीको बोतल उपलब्ध गराइने अनि राजस्व राम्रो भएमा ५० भारुमै उक्त बोतल उपलब्ध हुने उनले बताए । 

राज्य सरकारका मानिसहरूको रक्सी कारखाना भएको र तिनीहरूले घटिया रक्सी उपलब्ध गराइरहेको आरोप उनले लगाए ।