चिनियाँ सञ्चारमाध्यमले भारतलाई दियो यस्तो चेतावनी

चिनियाँ सञ्चारमाध्यमले पोहोर सालदेखि भारत र चीनबीच सीमामा जारी गतिराधको समाधान खोज्न र डिसइंगेजमेन्टका लागि हुने १४औं चरणको वार्ताअघि द्विपक्षीय सम्बन्ध सामान्य बनाउन अपील गरेको छ । 

चौधौं चरणको वार्ता कहिले हुन्छ भन्ने स्पष्ट छैन । तेह्र चरणसम्म चलेका कमान्डरस्तरीय वार्ता सफल भएनन् ।

चीनले वास्तविक नियन्त्रण रेखामा यथास्थिति बहाल गर्न नचाहेको भारतले बताएको छ । 

पूर्वी लद्दाखमा दुई देशबीच हट स्प्रिंग्स, डेप्साङ र चार्डिङ नाला जंक्सनका विषयमा विवाद छ । 

भारतले अनुचित माग उठाइरहेको र त्यसले गर्दा समस्या उत्पन्न भएको चीनले बताएको छ । 

परिस्थितिको गलत आकलन नगर्न चीनले भारतलाई चेतावनी दिएको छ ।

ग्लोबल टाइम्सको एक रिपोर्टमा उल्लेख गरिएअनुसार, गत डिसेम्बर १५ मा राष्ट्रपति सी चिनपिङ र रुसी समकक्षी भ्लादिमिर पुटिनबीच भएको भर्चुअल वार्तापछि पुटिनका सहयोगी युरी उशाकोभले चीन, रुस र भारतबीच बैठक आयोजन गर्ने प्रस्ताव राखेका छन् । तर दुवै पक्ष सीमाबाट पछि हट्दा र तनाव शान्त भएमा मात्र यस्तो त्रिपक्षीय वार्ता सम्भव हुन्छ । 

सरकारी पत्रिका चाइना डेलीले डिसेम्बर २७ मा प्रकाशन गरेको सम्पादकीयमा भारतले दर्जनौं चिनियाँ यापहरूमा लगाएको प्रतिबन्ध र भारतमा चिनियाँ उत्पादनको बहिष्कारका विषयमा व्यापक चर्चा गरिएको छ । भारतमा काम गरिरहेका चिनियाँ कम्पनीहरूमा हालैका दिनमा आयकर विभागले छापा मारेको खबरका बारेमा पनि विस्तारपूर्वक लेखिएको छ । भारत सरकारको यस कदमबाट उत्पादक र व्यावसायिक गतिविधि प्रभावित भएको उल्लेख पनि गरिएको छ । 

सीमामा डिसइंगेजमेन्टका विषयमा दुई देशबीच भएको १३औं चरणको वार्ता भारतको अनुचित र अवास्तविक मागका कारण परिणाममा पुग्न नपाएको पनि लेखिएको छ । 

ग्लोबल टाइम्समा डिसेम्बर २६ मा प्रकाशित एक टिप्पणीमा चीन र भारतबीच राम्रो र गहिरो व्यापारिक सम्बन्ध दुवै देशका लागि लाभदायक हुने लेखिएको छ । भारत चीनसँग बलियो गरी जोडिएको र अन्तर्राष्ट्रिय आपूर्ति शृंखलाको हिस्सा भएको कुरालाई अस्वीकार गर्न नसकिने लेखिएको छ ।