नेपाली कांग्रेस लुम्बिनी प्रदेशका सभापति अम्मरसिंह पुनले आफ्नो प्रतिस्पर्धी भरतकुमार शाहलाई दोस्रो वरीयतामा राखेका छन् ।

कांग्रेस प्रदेश समितिको पहिलो बैठकले पदाधिकारी र सदस्यहरूको मर्यादाक्रम निर्धारण गर्दा शाहलाई सभापति पुनले दोस्रो वरीयतामा राखेका हुन् । 

पार्टीका केन्द्रीय सभापति शेरबहादुर देउवाले आफ्ना प्रतिस्पर्धी शेखर कोइराला २० औं नम्बर राखेका बेला पुनले उदारता देखाएको कांग्रेस वृत्तमा चर्चा छ । 

रोल्पाका पुन पौडेल समूहबाट मंसिर १८ गते सभापतिमा निर्वाचित भएका थिए । पहिलो बैठकपछि पुनले शुक्रवार बुटवलमा पत्रकार सम्मेलन गर्दै दोस्रो वरीयतामा आफ्ना प्रतिस्पर्धी शाहलाई राखेको बताए । 

गौतमबुद्धको जन्मस्थल लुम्बिनीलाई केन्द्रमा राखेर समग्र प्रदेशको विकासको योजना अगाडि सार्ने कांग्रेसको योजना रहेको सभापति पुनले बताए । 

पुनले पछिल्लो समय युवाहरूमा राजनीतिप्रति वितृष्णा देखिएको अवस्थामा उनीहरूलाई आकर्षित गर्ने खालका कार्यक्रम अगाडि सार्ने बताए ।