झारफुकको नाममा बालिकाको हत्या गरेको आरोपमा माता भनेर चिनिने एक महिला पक्राउ परेकी छन् । 

हत्या आरोपमा नागार्जुन नगरपालिका–१, पानीट्याङ्कीमा टहरामा बस्दै आएकी आफूलाई माता बताउने उमा शाही ठकुरीलाई पक्राउ गरिएको महानगरीय प्रहरी परिसरका प्रवक्ता दिनेशराज मैनालीले बताए ।

प्रहरीका अनुसार २१ दिनअघि टाउकोमा समस्या देखिएपछि सिन्धुपाल्चोक चौतारा साँगाचोकगढी नगरपालिका–२ घर भई भक्तपुर धुन्चेपाखा बस्ने १४ वर्षीया बालिकालाई उनकी आमा रोशनी श्रेष्ठले उमाकोमा ल्याएकी थिइन् । 

उमाले आफूले निको बनाइदिने भन्दै ती बालिकालाई आफ्नो शरणमा छोड्न भनिन् । उपचार हुने आशामा बालिकालाई त्यही टहरोमा आफन्तले छाडेका थिए । 

तर, उमाको कुटपिटका कारण बालिका शनिवार बिहान ५ बजे अचेत भइन् । त्यसपछि ती माताले आफन्तलाई फोन गरेर बोलाएको र अस्पताल लैजाँदै गर्दा मृत्यु भएको एसपी मैनालीलेलोकान्तरलाई बताए । 

‘ती बालिका बेहोस भएपछि अस्पताल लगिएको थियो तर अस्पतालले त्यहाँ आउनुअघि नै मृत्यु भएको बताएको थियो,’ एसपी मैनालीले भने, ‘आफन्तले प्रहरीलाई खबर गरेपछि हामीले ती माता भनिने उमासहित तीन जनालाई पक्राउ गरेका छौं ।’

ती बालिकाको शरीरभरि निलडाम र चोटहरू देखिएका छन् । कथित माता उमाले त्रिशूलले घोचेर बालिकाको हत्या गरेको परिवारले आरोप लगाएका छन् । 

बालिकाका आफन्तका अनुसार उनको शरीरमा निलडाम, ठाउँ–ठाउँमा तीखो हतियारले घोचेका प्वालहरू छन् । प्रहरीका अनुसार मुखमा चोट र नाकबाट रगत आएको थियो । त्रिशूलले घोचे–नघोचेको पुष्टि नभएको तर कथित माताले दिएको यातनाबाट ती बालिकाको मृत्यु भएको प्रहरीको भनाइ छ । 

‘त्रिशूलले घोचेको भन्दा पनि ती माताले टाउकोमा पटकपटक हातले र कुचोले प्रहार गरेको देखिन्छ,’ महानगरीय प्रहरी वृत्त स्वयम्भूका प्रमुख मिलन केसीले भने ।

कक्षा ७ मा अध्ययनरत ती बालिकालाई परिवारले बीचमा परीक्षा आएको भन्दै लिनसमेत आएका थिए । तर, ती माता भनिने उमाले ‘ज्यान ठूलो कि पढाइ’ भनेर आफन्तलाई फर्काएको डीएसपी केसीले बताए ।